Author: Din Silva

දිනිති වැඩිපුරම අහසෙ ඉන්න කැමතියි වගේ…?

ඒ ඉතින් මගේ රුකියාවනෙ. මම ගුවන් සේවිකාවක් විදිහට සේවය කරන නිසා වැඩිපුරම අහසෙ ඉන්න සිද්ධවෙනවා. ඊට අමතරව මම මේ දවස්වල සිල්ලර සමනල්ලු ටෙලිනාට්‍යයේ ෂූටිංවලට සහභාගි වෙනවා. තව ටෙලිනාට්‍යයකට ආරාධනා ලැබුණා. හැබැයි ඉතින් ඒ ලැබෙන හැමදෙයක්ම බාරගන්නෙනම් නෑ.

හාරකෝටිය නිසා ජනප්‍රිය වුණු අභිෂේකා මෙහෙම ලැබෙන චරිත බාරගන්නෙ නැත්තෙ ඇයි… ආඩම්බරකාරියක් වෙලාද…?

අනේ.. නැහැ. එහෙම ආඩම්බර වෙලානම් නැහැ. මගේ රුකියාව නිසා තමයි මම එහෙම වැඩ එකදිගට බාරගන්නෙ නැත්තෙ. මමත් ආසයි ඒ ලැබෙන බොහෝ චරිත බාරගෙන කරන්න. නමුත් දින ප්‍රශ්නෙ නිසා තමයි මම එහෙම බාරගන්නෙ නැත්තෙ. බොහෝ වෙලාවට මම එක කාලයකදී එක නිර්මාණයක් විතරයි බාරගන්නෙ. හැබැයි ඉතින්… කොහොමහරි දින හදාගෙන නිර්මාණ කරන්න ආසයි.

ඔබ දකුණේ කෙල්ලක්.. එහෙම නේද…?

ඔව්.. මගේ ගම ගාල්ල. මට ඉන්නෙ මගේ අම්මයි තාත්තයි අයියලා දෙන්නයි ලොකුඅම්මයි විතරයි. මගේ අයියලා දෙන්නා විවාහකයි. මම තමයි අපේ පවුලේ එකම ගැහැනු ළමයා. ඉතින්… හැමෝගෙම ආදරයත් එක්ක හරිම සතුටින් මම ඉන්නවා.

දිනිති ඉගෙන ගත්තෙ මොන පාසලේද…?

මම ඉගෙන ගත්තෙ ගාල්ල සංඝමිත්තා බාලිකාවේ. මම විද්‍යා අංශයෙන් උසස් පෙළ හදාරලා ශිෂ්‍යත්වයක් ලැබිලා බැංගලෝරයට යන්න අවස්ථාව ලැබුණා. එහේ විශ්වවිද්‍යාලයේ ඉගෙනුම අවසන් කරලා ලංකාවට ඇවිත් ගුවන් සේවිකාවක් විදියට සේවයට බැඳුණා.

ඔබගේ පුංචි කාලයේ හීනය වෙලා තිබුණේ කවුරැ වෙන්නද…?

මගේ අම්මයි තාත්තයි දෙන්නම ගුරැවරැ. හැබැයි ගුරැවරියක් වෙන්නනම් මට ඕනවුණේ නැහැ. කාලයක් මට නීතිඥවරියක් වෙන්න ඕන වුණා. ඊටපස්සෙ මට මාධ්‍යවේදිනියක් වෙන්න ඕන වුණා. ඔය අතරේදී මම ටික ටික ලොකු වෙද්දී මගේ හිතේ තිබුණු ලොකුම හීනය වුණේ මේ ලෝකෙ වටේ ඇවිදින්න යන්නයි. ලෝකෙ වටේ ඇවිදලා ලෝකෙ දකින්න මම ආසා කළා. රටවල්වල සංචාරය කරපු අය අර රට ලස්සනයි, මේ රට ලස්සනයි කිය කියා ලෝකෙ දැක්කට මට ඒ කියන දේකින්වත් පින්තූරවලින්වත් ලෝකෙ දැක්කට වැඩක් නැහැ. මට ඕනවුණේ මගේ ඇස් දෙකෙන්ම ලෝකෙ ලස්සන දකින්නයි. ඒ නිසා ලෝකෙ දකින්න පුළුවන් රස්සාව මොකක්ද කියලා හිතද්දී තමයි ගුවන් සේවිකාවක් වීම පිළිබඳව මට අදහස ආවේ. ඒ විදිහට තමයි 2014 අවුරැද්දෙ මම ගුවන් සේවිකාවක් විදිහට එකතු වුණේ.

රංගන ශිල්පිනියක් වීම ගැන ගෙදර අය මොකද කිව්වේ…?

මුලදීනම් ගෙදරින් පොඩ්ඩක්වත් කැමැත්තක් තිබුණේ නැහැ. මගේ අයියලා දෙන්නා තදින්ම විරැද්ධ වුණා. හැබැයි මගේ තනි කැමැත්තට වගේ තමයි මම රංගන ශිල්පිනියක් වුණේ. හැබැයි දැන් එහෙම නැහැ. දැන් ගෙදරින් ලොකු සහයෝගයක් මට ලැබෙනවා.

පුංචි කාලේ ඔබ මොනවගේ චරිතයක්ද…?

ඔව්… අපේ ගෙදර ඉස්සර මම Tom boy වගේ තමයි. පුංචි කාලේ දඟලලා අතපයවල තවමත් තුවාල කැළල් පාරවල් තියෙනවා. මගේ අයියලා දෙන්නත් එක්කම තමයි මම සෙල්ලම් කළේ. ඒ දෙන්නා එක්ක ගමේ ගස්වල නැඟලා සෙල්ලම් කරපු කාලේ මට කවදාවත් අමතක වෙන්නෙ නැහැ. ඉස්සර මම පුදුමාකාර දඟ චරිතයක්.

හාරකෝටිය දිනිතිගේ මුල්ම රංගනයනෙ… කොහොමද ඒ අවස්ථාව ලැබුණේ…?

මගේ තාත්තා නාට්‍ය හා රංග කලාව සම්බන්ධව ගුරැ උපදේශකයෙක් විදිහට සේවය කරලා තමයි විශ්‍රාම ගියේ. ඉතින් මම පාසල් වේදිකා නාට්‍යවල රඟපෑවා. ඒවායින් සම්මාන පවා ලබාගත්තා. පාසල් වේදිකාවේදී හොඳම නළුවා සහ හොඳම නිළිය කියන හැම සම්මානයක්ම මට ලැබුණා. අවුරැදු හතක් එකදිගට පාසල් වේදිකාවේ සම්මාන මට හිමිවුණා. ඉතින්… ඒ මොන දේ කළත් මේ රංගන ක්ෂේත්‍රයට එන්න මට ලොකු කැමැත්තක් තිබුණේ නැහැ. කාලයක් ගියාට පස්සෙ චාමර සමරවික්‍රම අයියා මට හාරකෝටිය ටෙලිනාට්‍යයට කතා කළා. මම මගේ රස්සාවට ගොඩක් ආදරෙයි. ඒ නිසා මම මුලින්ම අකමැති වුණා. රස්සාව තමයි මගේ අංක එක. ඉතින් ඒ නිසා වෙලාව මදිවෙයි කියලයි මම හිතුවේ. ඒ වුණාට පස්සෙ මම කැමති වුණා. හැබැයි හාරකෝටියට සම්බන්ධ වුණාට පස්සෙ මම ඒකට ගොඩක් ආසා වුණා. මම තවමත් අභිෂේකාට ආදරෙයි. අභිෂේකා නිසා තමයි මට මේ හැමදෙයක්ම ලැබුණේ. මිනිස්සු මාව දැනගන්නෙ අභිෂේකා නිසාමයි.

ජනප්‍රිය නිළිය සම්මානයට ඔබ නිර්දේශ වෙන්නෙත් අභිෂේකා නිසාමයි…?

ඔව්… අනිවාර්යයෙන්ම. පිටරට ගියාම අභිෂේකා නිසා මට මාර විදිහට ප්‍රතිචාර ලැබෙනවා. ගුවන් යානයේදී වුණත් බොහෝ දෙනා මාව හඳුනාගෙන මාත් එක්ක කතා කරනවා. ෆොටෝ ගන්නවා. ලංකාවේදී වුණත් මම කොහේ ගියත් මාත් එක්ක කතා කරන, හිනාවෙන අය ඉන්නවා. ඉතින් ඒ ලැබෙන ආදරයට මම ගොඩක් ආදරෙයි. සිල්ලර සමනල්ලු නාට්‍යයටත් ගොඩක් හොඳ ප්‍රතිචාරයක් ලැබෙනවා.

දිනිති සැබෑ ජීවිතේ ආදරවන්තියක්… මම හරි නේද…?

ඔව්… ආදරය ඉතින් අපි හැමෝටම ලැබෙනවනෙ. අම්මා තාත්තගෙන් ඒ ආදරය ලැබෙනවා. මගේ පළමු ප්‍රේමය තමයි ටයිටැනික් ෆිල්ම් එකේ රඟපාපු ලියනාඩෝ. ඉතින්.. ඇත්ත. මම ආදරේ විඳලා තියෙනවා.

සිනමාවට ඔබට ආරාධනා ලැබිලා නැද්ද…?

නිර්මාණ කිහිපයකට ආරාධනා ලැබුණා. හැබැයි ඒ නිර්මාණවලට දින දෙන්න මට ටිකක් අමාරැයි. ගුවන් සේවිකාවක් විදිහට වැඩ කරද්දී දින වෙන්කරන්න ටිකක් අමාරැයි. ඉතින්.. හොඳ නිර්මාණ කිහිපයක්ම මගෙන් මඟහැරැණා. මොනවා කරන්නද…?

මම මගේ රස්සාවට ආදරෙයිනෙ. බලමු.. ඉදිරියේදී හොඳ නිර්මාණයකට කාලයක් වෙන්කරගන්න බොහෝදුරට පුළුවන් වේවි. මගේ ජීවිතේ ලොකු බලාපොරොත්තු නැහැ. මේ ගෙවන ජීවිතේට මම හරි ආදරෙයි.

 

The post මගේ පළමු ප්‍රේමය තමයි ටයිටැනික් ෆිල්ම් එකේ රඟපාපු ලියනාඩෝ appeared first on Gossip News | Rajagossip | Latest Gossip | ගොසිප් | rajagossip.lk - Raja Gossip.

Source Link : Gossip – Gossip News | Rajagossip | Latest Gossip | ගොසිප් | rajagossip.lk – Raja Gossip

වැඩිපුර පේන්න හිටියට නාළිකා බදු අරගෙන නැතිලූ. චරිත කළු ද සුදු ද කියල බලන්නෙ නැතුව හරියට කරන්නලූ කැමති. අසාධාරණයට අකමැති නිසා පොඩ්ඩක් විතර නපුරුයිලූ. කටකතාවලට කිසිම බයක් නැති මෙයා රසික ආදරේට ආදරේ කරමින් සතුටින් කාලෙ ගෙවනව කියල තමයි මීවිතට කිව්වෙ.

කොහොමද රුක්‍ෂානා ජීවිතේ?

කියන්න තරම් වරදක් නෑ. ඒ වගේම ලොකු හොඳකුත් නෑ. බොහොම සරලව ඔහේ ගලාගෙන යනව. මොනව වුණත් ඒ අතර මම සතුටින්.

මේ දවස්වල නාළිකා බදු අරගෙන වගේ?

එහෙමම නෑ ඉතින් කාලෙකට පස්සෙ වැඩ ඉවර කරල තිබුණු ටෙලි හතරක් විතර එක පාරටම ප්ලේ වෙන්න ගත්ත.

වැඩිපුර කැමති මොන වගේ චරිත වලටද?

එහෙම විශේෂයක් නෑ. ලැබෙන චරිතෙ කළු ද සුදු ද දිග ද කොට ද වගේ වැඩි වං හුං හොයන්නෙ නෑ. ලැබෙන දේ භාර අරගෙන හොඳින් කරන්න තමයි මම කැමති.

චරිතයක් භාරගනිද්දි රුක්‍ෂානගෙ කොන්දේසි මොනවගේද?

කොන්දේසි දාල භාරගන්න තරම් චරිත ලැබෙන්නෙ නෑනෙ. ඒ නිසා කොන්දේසි විරහිතයි. අදාළ නිර්මාණයේ අධ්‍යක්‍ෂවරයත් එක්ක ඒ ගැන කතාබහ කරගන්නව.

ටෙලි නාට්‍යවලට වැඩි ඉඩක් වෙන්කරල තියෙන්නෙ සිනමාවට ආරාධනා නැති නිසා නේද?

ඇත්තටම ඔව්. හැම වෙලාවෙම වැඩි ඉඩක් වෙන්කරන්න ඕන අපට ලැබෙන දේටනෙ. මේ වෙනකොට ලැබිල තියෙන්නෙ ටෙලිනාට්‍ය නිසා මම කාලය වෙන්කරල තියෙන්නේ ටෙලිනාට්‍ය වලට. සිනමාවට ආරාධනා ලැබුණ දවසක ඒ සඳහා ඉඩක් වෙන්කරනව. කොහොමටත් ලැබිච්චි නැති දේකට කාට වුණත් වෙලාවක් වෙන්කරන්න බැහැනෙ.

ඔබ නපුරු දඩබ්බර චරිතයක් කියල චෝදනා කළොත්?

මම ඒ චෝදනාව පිළිගන්නවා. දඩබ්බරකම් කෙසේ වෙතත් මම සැබෑ ජීවිතේදී ටිකක් විතර නපුරුයි. රංගන ජීවිතයේදී ඉතින් චරිතෙට ඕන විදියටනෙ අපි හැසිරෙන්නෙ. නපුරුකමක් හිතේ තිබ්බත් කරුණාවන්ත විදියට හැසිරෙනවා. ඒකනෙ රඟපානව කියන්නෙ.

මෙතෙක් රඟපෑ චරිත අතරින් ඔබ වඩාත් කැමති චරිතය?

මෙහෙමයි මම කරපු චරිතවලින් එකකට වඩා තව එකක් හොඳයි කියල නම් කරන්න බෑ. මොකද ඒ එකක්වත් මම අකමැත්තෙන් කළේ නැහැනෙ. ඒ නිසා ඒ හැම චරිතෙකටම මම කැමතියි.

රසිකයො ආදරෙන් වැළඳගත්තෙ කුමන චරිතය කියල ද ඔබ හිතන්නෙ?

අනිවාර්යයෙන්ම මෙඩිසිනා නාට්‍යයේ මම කරන ජූඩිගෙ චරිතය. ඒක මට හොඳින්ම දැනුන දෙයක්.

රුක්‍ෂානා අද දවසේ පූර්ණකාලීන රංගන ශිල්පිනියක්?

රංගන ශිල්පිනියක්ම විතරක් නෙමෙයි නර්ථන ශිල්පිනියක් විදියටත් වැඩ කරගෙන යනවා. ඉදිරියේදී කලා කටයුතුවලට බාධාවක් නොවෙන විදියට බොහෝ දුරට මම රැකියාවකුත් කරයි.

ජනප‍්‍රිය වීම හිසරදයක් කියල ඔබට දැනිල තියෙනවද?

අනේ මට නම් කවදාවත් එහෙම හිතිල නෑ. ඉදිරියේදී හිතෙන එකකුත් නෑ. මම හරිම කැමතියි ඕනම කෙනෙක් ඇවිල්ල මාත් එක්ක හිනාවෙලා කතාබහ කරනවට.

නව පරපුරේ සැරපරුෂ රංගන ශිල්පිනියක් විදියට ඔබ ප‍්‍රසිද්ධයි?

ඔය සැරපරුෂ කියල මාව හඳුන්වන්නෙ මොකද දන්නවද මට කොතැනකදිවත් බොරුවයි හොරකමයි පේන්න බැහැ. එවැනි දෙයක් දුටු ගමන් කේන්ති යනවා. ඒ ගැන කතා කළාම බලන් ඉන්න අය අපිව සැරපරුෂයි කියල හඳුන්වනව.

වේදිකාවට ගොඩවෙන්න ඔබේ වැඩි උනන්දුවක් නෑ වගේ?

නැත්තෙ නෑ. මම වේදිකාවෙත් වැඩකරපු කෙනෙක්. ඒත් දැනට තියෙන කාර්ය බහුලත්වය නිසා ආරාධනාවක් ලැබුණත් වේදිකාවට ගොඩවෙන්න බැරිකමයි තියෙන්නෙ. මම වේදිකාවට හරිම ආදරෙයි. ඉදිරියේදී කොහොමහරි වෙලාව වෙන්කරගෙන වේදිකාවට ගොඩවෙනවා.

නර්තනය ජයගත් ශිල්පිනියක් හැටියට රුක්‍ෂානගෙ දැනුම අනාගත පරපුරට දායාද කරන්න බලාපොරොත්තුවක් නැද්ද?

ඇයි නැත්තෙ. මම දැනටමත් ඒ සඳහා යොමුවෙලා ඉවරයි. රුක්‍ෂානා දිසානායක ඇකඩමිය හරහා උසස් පෙළ දක්වා මම නර්තනය උගන්වනවා. ඊට අමතරව මගේම නර්තන කණ්ඩායමකුත් මම හදාගෙන තියෙනවා.

අද තියෙන වෙබ් අඩවි ගැන රුක්‍ෂානට මොකද හිතෙන්නෙ?

කාගෙ හරි ඕපදූපයක් බොරු ආරංචියක් කට කතාවත් මාකට් කරල හිට් වෙන්නනෙ ඕව හැදිල තියෙන්නෙ. අපේ ඉන්න සමහර කට්ටිය තමන්ගෙ දක්‍ෂතා ගැන හැඟීමක් නැතුව මොකක්හරි අමන වැඩක් කරල ගොසිප් එකක් මවාගෙන ඒව ඇතුළෙ වැජඹෙන්න හදනව. ඕව හොඳ ඒ වගේ අයටම තමයි.

යොවුන් වියේ පසුවන දඟකාරියක් හැටියට ඔබ කටකතාවලට බයද?

අයියෝ ඕව මොනවද කවුද ගණන් ගන්නෙ. රුක්‍ෂානා දිසානායක කියන්නෙ කටකතාවලින් බය කරන්න පුළුවන් කෙනෙක් නෙමෙයි.

රූමත් රංගන ශිල්පිනියක් නිසා ආදර යෝජනා පෝළිමේ එනව කියන්නෙ ඇත්තද?

ඔව්. ආදර යෝජනා පෝළිමේ ආපු කාලයක් තිබුණා. හැබැයි ඒ රූමත්කම නිසාවත් රංගන ශිල්පිනියක් නිසාවත් නෙමෙයි මම ගැහැනු ළමයෙක් නිසා. ඒත් දැන් ඒ පෝළිම නැවතිලා මොකද බොහෝ දෙනෙක් දන්නවා මම දැන් පෙම්වතියක් කියල.

ධම්මික හේවාවසම්

 

The post මම හරිම කැමතියි ඕනම කෙනෙක් ඇවිල්ල මාත් එක්ක හිනාවෙලා කතාබහ කරනවට appeared first on Gossip News | Rajagossip | Latest Gossip | ගොසිප් | rajagossip.lk - Raja Gossip.

Source Link : Gossip – Gossip News | Rajagossip | Latest Gossip | ගොසිප් | rajagossip.lk – Raja Gossip

ඡායාරූපය දැකල නේද ඔබ එකපාරටම නතරවුණේ. ඒ ඇයට ඔබ ඒ තරමටම කැමැති නිසානේ. නර්තනයෙන් නිවේදනයෙන් ඇය ඔබේ හිත තදින්ම අල්ලගෙන ඉන්නේ. ඒ නිසාමයි ඇය කියන්නේ මොනවාද කියලා බලන්නේ නැතුව ඔබට මේ පිටුව පෙරළන්න බැරි. ඔව් ඔබ වගේ ඇයට බොහෝ දෙනා කැමැතියි. ඒ හින්දා කලබලේට වගේ එහෙන් මෙහෙන් කියවලා මේ පිටුව පෙරළන්නෙ නැති බව මම දන්නවා. මම තව දුරටත් ඔබේ රසවින්දනයට බාධා කරන්නේ නැහැ. ඇය කියන්නේ මොනවාද කියල බලලා පිටුව පෙරළමු. මේ ඔබ වඩාත් ආදරය කරන සචිනි නිපුන්සලා.

සචිනි මොකද කරන්නේ ?

මේ දවස්වල ඉතිං සුපුරුදු විදියට වැඩ කරගෙන යනවා. දෙරණ ලිට්ල් ස්ටාර් සහ චැම්පියන් ස්ටාර් වැඩසටහන්වල නිවේදන කටයුතු කරගෙන යනවා. ඊට අමතරව Youtube චැනල් එකේ වැඩ කරගෙන යනවා.

නර්තනය සහ නිවේදනය දෙක කොහොමද ඔබ සමබරව කරගෙන යන්නේ ?

නර්තනය මම ළඟදී පටන් ගත්ත එකක්. පුංචිකාලේ ඉඳන් මම කැමැතියි නර්තනයට. නමුත් මට ඒක වෙනම කරන්න අවස්ථාවක් ලැබුණේ නැහැ. මම නර්තනය ඉගෙනගෙනත් නැහැ. තිබුණ කැමැත්ත නිසාම තමයි පටන් ගත්තේ. සමබරව කරගෙන යනවා කියන්නේ මම ඒක ගොඩක් කැමැත්තෙන් කරන්නේ. භාරගත්ත වැඩ අවසන් වුණාම ෂේප් එකේ වෙලාවක් දාගෙන ඒ දේවල් පුහුණුවීම් කටයුතු කරගෙන යනවා.

ඔබ නර්තනය ඉගෙනගෙනත් නැතිනම් කොහෙන්ද ඔබට නර්තනයට දක්ෂතාව එන්නේ ?

මම ලිට්ල් ස්ටාර් කරන්න පටන් ගත්තට පස්සේ පොඩි කාලේ ඉඳන් නටන්න මගේ හිතේ තිබුණ ආසාව වැඩිවෙනවා. අවුරුදු 10 ක වගේ ඉදන් එක දිගට ලිට්ල් ස්ටාර් වේදිකාවේ නිවේදන කටයුතු කරනවා. ඒ දේවල් දැකලම සහ ඒ දේවල් වලින් මම ගොඩක් දේවල් ඉගෙනගත්තා. ඒ හින්දා මට ඒක ගොඩක් දැණුනා. ඒ වගේම මම නර්තනය ගැන ලංකාවේ වගේම ලෝකෙම නර්තනයන් ගැන හොයන කෙනෙක්. ඒ දේවල් මම ගොඩක් බලනවා. ඒ නිසා වෙන්න ඇති මේ හැකියාව මට එන්න ඇත්තේ.

Youtube විසේකාරී නමින් තමයි අද ඔබ ප්‍රසිද්ධ.Youtube එක හරහා මොකක්්ද මේ කරන්න යන්නේ ?

ඒක ඇත්තටම අහම්බෙන් වෙච්ච දෙයක්. මට ලැබුණු ආරාධනාවකට තමයි මම විසේකාරී නටන්න යන්නේ. ඒක මං කොහොමටවත් හිතපු නැති විදියට මිනිස්සු අතරට ගියා. මිනිස්සු ඒකට කැමැති වුණා. ඒක මම කිසිම විදියකට සැලසුම් කරලා කරපු දෙයක් නෙවෙයි. නමුත් ඒකෙන් පස්සේ මට හිතුණා ජාත්‍යන්තරයේ කලාකාරයනුත් ඒ දේ කරන නිසාYoutube චැනල් එකක් පටන්ගන්න. දෙරණ ආයතනයේ විධායක අධ්‍යක්ෂක මාධව මඩවල මහතාගේ අදහසකට අනුව තමයි මම චැනල් එක පටන්ගත්තේ. අහම්බෙන් වුණාට හිතුවට වැඩිය ප්‍රේක්ෂක ප්‍රතිචාර ලැබෙන්න ගත්තා. ඒ ගැන ලොකූ සැලසුම් නැහැ. මිනිස්සු කැමැති තාක් මිනිස්සු බලන තාක් මම ඒක කරගෙන යන්න තමයි හිතාගෙන ඉන්නේ.

නර්තන රියැලිටි තරගයකට ඔබට ආරාධනා කළොත් ඔබ ඒ ආරාධනාව භාරගන්නවාද ?

දෙරණ මට ගෙදර වගේ. ඒ ආයතනයේ මම ස්ථිර රැකියාවක් කරන්නේ. නර්තනය මගේ විනෝදාංශයක් විතරයි. නර්තනය පැත්තෙන්Youtube එක විතරක් කරගෙන හිටියොත් හොඳයි කියලා මම හිතනවා.

නර්තන වැඩමුළුවක් කරනවා කියලා ආරංචියි ?

ඔව්. ඒ කතාව හරි. මගේ ඇෙග් තියෙන්නෙ බොලිවුඩ් ඩාන්සින්. ඒ හින්දා පබ්ලික් එකත් එකතු කරගෙන ඔවුන්ට පොඩි වැඩමුළුවක් කරන්න හිතුවා. මං දන්න දේවල් ඒ අයත් එක්ක බෙදා හදාගන්න. මේ මාසේ 09 වැනිදා තමයි තියෙන්නේ. උදේ 10.30 ඉඳන් 12.30 වෙනකම් නුගේගොඩ පාගොඩ පාරේ තියෙන ස්ට්‍රෙච් ඩාන්සින් ස්කූල් එකේ තමයි තියෙන්නේ. නටන්න කැමැති හැමෝටම ආරාධනා කරනවා එදාට එන්න කියලා.

මේ තරම් කාලයක් නිවේදනය කරන ඔබට රංගනයට ආරාධනා ලැබුනේ නැද්ද ?

ආරාධනා ලැබිලා තියෙනවා. නමුත් රංගනයට මම උනන්දු නැහැ. අපිට සතුටුවෙන්න පුළුවන් දෙයක්නේ අපි කරන්න ඕනෑ. රංගනයට මම උනන්දු නැති නිසා මං ඒ ගැන හිතන්නේ නෑ. රංගනයට දක්ෂතාවයක් තියේවිද කියන්නවත් මම දන්නේ නෑ.

සචිනි ගොඩක් ආඩම්බරයි කියලා බොහෝ දෙනෙක් කියනවා ?

මට ඉස්සර ගොඩක් අය එහෙම කියනවා. මම පවුලේ එකම දරුවා. ඒ හින්ද තනියම තමයි ගොඩක් හැදුණේ. මිනිස්සුත් එක්ක ඉන්න ඕනෑ කියන දේ මම දැනගෙන හිටියේ නෑ. නමුත් දැන් මම එහෙම නෑ. ගොඩක් මිනිස්සු මාත් එක්ක කතාබහ කරනවා.

දැන්ම විවාහවෙන්න අදහසක් නැද්ද ?

දැන්ම විවාහවෙන්න හිතලා නැහැ. කාලය ආවම ඒ දේවල් සිද්ධ වෙයි. හැමදේටම වෙලාවක් තියෙනවනේ. බලමු වෙලාව ආවම.

ප්‍රසංග මාභරණ

   

The post මං කොහොමටවත් හිතපු නැති විදියට මිනිස්සු අතරට ගියා appeared first on Gossip News | Rajagossip | Latest Gossip | ගොසිප් | rajagossip.lk - Raja Gossip.

Source Link : Gossip – Gossip News | Rajagossip | Latest Gossip | ගොසිප් | rajagossip.lk – Raja Gossip

ගීත රූප රචනා බොහෝමයක් හරහා ප්‍රේක්‍ෂක ආදරය දිනාගත් නිෂි සමරවීර මෑත කාලයේ කලා ක්‍ෂේත්‍රය තුළ නිතර දක්නට ලැබෙන නිරූපිකාවකි.නිරූපණ ක්‍ෂේත්‍රයට අමතරව රංගන ශිල්පිනියක ලෙසද කටයුතු කරන ඇය මේ දිනවල විකාශය වන ටෙලිනාට්‍ය කිහිපයකින්ම දැකගත හැකිය. ‘නිෂි බ්‍රයිඩ්ල්’ නමින් පසුගියදා තමන්ගේම ව්‍යාපාරයක් ආරම්භ කළ ඇය සිය ඉදිරි කලාකටයුතු පිළිබඳ කතාබහ කිරීමට මෙලෙස අපට සම්බන්ධ වූවාය.

අලුත් නිර්මාණ ගැන කිව්වොත්?

මේ දවස්වල ‘දෙරණ’නාළිකාවේ විකාශය වන ‘දෝණ කතිරනා’ ටෙලිනාට්‍යයේ වැඩ කරනවා. ඊට අමතරව සිරස නාළිකාවේ විකාශය වන ‘නීල පබලු’ ටෙලිනාට්‍යයේ කටයුතු සිදුකරනවා. ඊට අමතරව මගේ සැලූන් එකේ වැඩකටයුතුත් කර ගෙන යනවා.

කොහොමද මේ නාට්‍ය දෙකට අවස්ථාව ලැබුණේ සහ ප්‍රතිචාර ගැන කිව්වොත්?

‘නීල පබලු’ නාට්‍යයට අවස්ථාව ලැබුණේ නිල්වලා එකෙන් තමයි මට කතා කළේ. ස්ක්‍රීන් ටෙස්ට් ගිහිල්ලා ඒකෙන් තේරිලා අවස්ථාව උදා වුණා. ‘දෝණ කතිරිනා’ ටෙලිනාට්‍යයට අවස්ථාව ලැබුණෙත් මාව දැකලා. ඉතිං ඒ වගේ අවස්ථාව නිසා ටෙලිනාට්‍ය දෙකටම හොඳ ප්‍රතිචාර ලැබෙනවා. ඊට අමතරව තවත් අලුත් නාට්‍යයක් සඳහා කතා කරලා තියෙනවා. ඒකත් පටන් ගන්න තියෙනවා මේ මාසෙන් පස්සේ.

මේ දවස්වල මියුසික් වීඩියෝවලින් ඈත් වෙලාද?

මේ දවස්වල නාට්‍ය දෙකේ වැඩකටයුතු එක්ක කාලවේලාවේ පොඩි අපහසුතාවක් තියෙනවා. අයින් වෙලාම නැහැ. එන හොඳ වැඩක්, හොඳ ටිකක් තෝරාගෙන කරන්න බලාගෙන ඉන්නවා.

නිරූපණය නිසා නේද රංගන අවස්ථාවන් ලැබෙන්නේ?

ඔව්, මම රංගනයට එන්නේ නිරූපණය නිසා. මුලින්ම මම මොඩලින්, බ්‍රයිඩල්, වෙළෙඳ දැන්වීම් සහ මියුසික් වීඩියෝ තමයි කළේ. ඊට පස්සේ තමයි ටෙලිනාට්‍යවලට දායක වුණේ. ඉතිං දැන් රංගනය පැත්තට වැඩි කාලයක් දීලා නිරූපණ කටයුතුත් සමබරව කරගෙන යන්න උත්සාහ කරනවා.

දැන් නිරූපණයට වඩා රංගනයට වැඩි ඉඩ?

දෙකම සමබරව කරන්න තමයි හිතාගෙන ඉන්නේ. නමුත් රංගනය පැත්තට වැඩි කාලයක් දෙනවා. මොකද මට රංගනය පැත්තෙන් වැඩි කාලයක් හදාගන්න ඕන නිසා.

මුල්ම ටෙලිනාට්‍යයට අවස්ථාව ලැබුණේ කොහොමද?

‘හිරු අවුරුදු කුමාරිය’ තරගයේ ජයග්‍රහණයත් සමගින් හිරු නාළිකාවේ නාට්‍යයක් සඳහා තමයි මට මුලින්ම අවස්ථාව ලැබුණේ. ප්‍රභාත් රෝෂන් අයියාගේ ‘කවුරුන්ද නුඹ මගේ’ ටෙලිනාට්‍යය තමයි මගේ මුල්ම ටෙලිනාට්‍යය වෙන්නේ. මේ ටෙලිනාට්‍යය නිසා තමයි මට අනිත් දේවල් සඳහා අවස්ථාව ලැබුණේ.

නාට්‍ය තුනේම චරිත කොහොමද?

මට ලැබුණු චරිත එකිනෙකට වෙනස්. නමුත් ‘නීල පබලු’ එකේ චරිතයට ටිකක් වෙනස්. ඒක අක්කා කෙනෙක්ගේ චරිතයක් කරන්නේ. ‘කවුරුන්ද නුඹ මගේ’ නාට්‍යයේ කපටි, ඩබල් ගේම් ගහන කෙනෙක්ගේ චරිතයක් තමයි කරන්නේ. ‘දෝණ කතිරිනා’ නාට්‍යයේ සම්පූර්ණ ආදරණීය කතාවක්.

ඔබේ පෙනුම නිසා චරිත සීමා වෙනවා නේද?

ඇත්ත. නමුත් මගේ පෙනුම එක්ක ගොඩක් ආරාධනා ලැබෙන්නේ මොඩර්න් චරිතවලටයි. හැබැයි ‘දෝණ කතිරිනා’ සාම්ප්‍රදායික පෙනුමක් තමයි තියෙන්නේ. එකේ වෙනස්ම ප්‍රතිරූපයක්. ඇඳුමේ ඉඳන් එහෙමයි.

චරිත වෙනුවෙන් බාහිර පෙනුම වගේ වෙනස් කරන්න කැපකිරීම කරනවාද?

මම කැමැති වෙනස් දෙයක් කරන්න. වෙනස් දෙයක් කළොත් හැම කෙනා අතරම කතාබහක් ඇති වෙන්නේ. පොෂ් චරිත හැමදාම කරලා වැඩක් නැහැ. ඒක නිසා චරිතයක් වෙනුවෙන් කැපකිරීම් කරන්න මට පුළුවන් කියලා මම හිතනවා.

සිනමාවට දායක වුණේ නැද්ද?

මම එක් චිත්‍රපටයක ප්‍රධාන චරිතය සඳහා රංගනයෙන් දායක වුණා. ඒක ඉස්සරහට එන්න තියෙන චිත්‍රපටයක්. ඒකේ අධ්‍යක්‍ෂ නම් අලුත් කෙනෙක්.

ව්‍යාපාරයක් පටන් ගත්තා නේද?

ඔව්, සැලොන් එක පටන් ගත්තා. ගොඩක් කාලයක් තිස්සේ තිබුණු බලාපොරොත්තුවක් ඒක. හොඳ ගමනක් යනවා. නිරූපණය, රංගනය කියන දෙයින් හදාගන්න දෙයත් ව්‍යාපාරයටත් යොදන්න බලාපොරොත්තු වෙනවා.

රංගනය ගැන හිතෙන්නේ මොනවාද?

රංගන කියන දේ හොඳයි. මට වැඩ කරන්න ලැබෙන්නෙත් ප්‍රවීණ අය එක්ක. ඉතිං ඒ අයගෙන් දෙවල් ඉගෙන ගන්නත් මට අවස්ථාව ලැබෙනවා. අපි තාම හැදීගෙන එන අයනේ. ඒ අයට ලොකු අත්දැකීම් තියෙනවා. අපිත් ඉගෙන ගන්නේ එයාලගෙන්. ඒ නිසා හොඳ ප්‍රතිචාර තියෙනවා.

නවකයන්ට අයුතු යෝජනා කරනවා කියන්නේ ඇත්තද?

අයුතු යෝජනා නැත්තෙත් නැහැ. අයුතු යෝජනා මටත් ඇවිත් තියෙනවා. ඒක තමන්නේ ප්‍රතිරූපයත් එක්ක තමයි හැදෙන්නේ. කෙනෙක්ව මනින්නේ තමන් හදාගන්න ප්‍රතිරූපයත් එක්කනේ. තමන් හදාගන්න ප්‍රතිරූපය තමයි මෙතැන වැදගත් වෙන්නේ. එතකොට තමන් යන ගමන හරියට ගෙනයන්න පුළුවන්. තමන් හරියට ප්‍රතිරූපයක් ගොඩනගා ගෙන ක්‍ෂේත්‍රය තුළ ඉන්නවා නම්, අයුතු යෝජනා කරන්න කවුරුත් එන්නේ නැහැ. මම එහෙම යෝජනා ආවත් මම ඒවා ප්‍රතික්‍ෂේප කරනවා. ඒ වැඩෙත් අතහරිනවා. මොකද මට එහෙම වැඩ වැඩක් නැහැ. හොඳ වැඩ විතරක් බාරගෙන මගේ ගමන මම යනවා.

ඒ දේවල් නිසා කලකිරීමක් නැද්ද?

මටත් මුල් කාලයේ ඇත්තටම ක්‍ෂේත්‍රය ගැන ලොකු කලකිරීමක් තිබුණා. මම මුල් කාලයේදී නාට්‍යය කියන දේත් අතහැරලා දාලා හිටියා. මට නාට්‍ය ඕන නැහැ. මොකටද මේ දේවල් කියන තැන හිටියා. නමුත්ට හැකියාවක් නැත්නම් අයින් වෙලා ඉන්න වෙනම දෙයක්. හැකියාවක් තියාගෙන තමන්ට ඉස්සරහට ගමනක් යන්න පුළුවන් කියලා අයින් වෙලා ඉන්න එකේ තේරුමක් නැහැ කියලා හිතුණා. ඉතිං මගේ දේවල්වලට යන්නේ මගේ සැමියා එක්ක. එයත් එක්ක ගිහිල්ලා මගේ වැඩ දේවල් හරියට කරනවා.

මේ දේවල්වලට පවුලේ කැමැත්ත කොහොමද?

මට ගොඩක්ම සහයෝගය හම්බ වෙන්නේ මගේ සැමියාගෙන්. මම කරන්න ඕන වැඩ මොනවාද?, ඒ දේවල් තෝරාගන්නේ කොහොමද, රංගනයේ අඩුපාඩු මොනවාද කියන හැමදේම ඔහුගෙන් මට ලැබෙනවා. ඒ හැරෙන්න මගේ අම්මයි, තාත්තයි, මගේ නංගියි මගේ පස්සෙන් ඉන්නවා. මගේ හැමදේකම ප්‍රතිඵලය සහ සතුට භුක්ති විඳින්නේ මගේ සැමියා තමයි.

මියුසික් වීඩියෝවල සරාගී දර්ශනවලටද වැඩිපුර ආරාධනා ලැබෙන්නේ?

මට නම් එහෙම කතා කරලා නැහැ. මම කරපු දේවල්වල එහෙම දේවල් තිබුණේ නැහැ. මට එහෙම ලොකුවට එහෙම කියලා නැහැ. නමුත් පසුගිය දවස්වල ට්‍රෙන්ඩ් එකක් තිබ්බනේ. හිට් වෙන්න ඕන නම් අඩනිරුවත් දේවල්වලට දායක වෙන්න. නමුත් දැන් ඒ දේවලුත් නැහැනේ. ඒ දේවල්වලින් තමයි මියුසික් වීඩියෝ හිට් කරන්නේ. දැන් ඒකත් බිඳගෙන සාම්ප්‍රදායික ලෙස මියුසික් වීඩියෝ කරනවා. දැන් ආයේ පරණ විදියටම මියුසික් වීඩියෝ නිර්මාණය වෙනවා.

කලාව පිළිබඳ යම්කිසි හැදෑරීමක් නැතුව කරන්න පුළුවන්ද?

බැහැ. කලා ක්‍ෂේත්‍රය පිළිබඳ හැදෑරීමක් තියෙන්න ඕන. එක්කෝ තමන්ගේම හැකියාවක් තියෙන්න ඕන. නැත්නම් අනිවාර්යයෙන්ම හදාරන්න ඕන. මොඩලින් කළත්, හැදෑරීමක් නැතුව රෑම්ප් කරන්න බැහැ. ඒ වගේම තමයි රංගනය කියන්නෙත්. මමත් තාම ඉගෙන ගන්නවා.

ඉදිරි කටයුතු ගැන කිව්වොත්?

මගේ මියුසික් වීඩියෝ කරපු දේවල් එන්න තියෙනවා. ඒ වගේම වෙළෙඳ දැන්වීම්. අලුත් වැඩකටයුතු දෙක තුනක් ඇවිල්ලා තියෙනවා. බ්‍රයිඩල් නම් සුපුරුදු පරිදි කරගෙන යනවා. හැමදේම වෙලාව හදාගෙන කරන්න බලාපොරොත්තු වෙනවා. සැලූන් එකේ වැඩත් කරගෙන යනවා. සැලූන් එක පටන් අරන් මාස හතරයි. හොඳ ප්‍රතිචාර තියෙනවා. මගේ වැඩ ටික හොඳින් කරගෙන යන්න බලාපොරොත්තු වෙනවා.

අතහිත දුන් අය ගැන කිව්වොත්?

උදවු කරපු අය නම් ගොඩක් ඉන්නවා. මුලින්ම ‘නිල්වලා’ ආයතනයේ හැමෝටම. සිසිර රත්නායක අයියාට ස්තූති කරනවා මාව හොඳ වැඩකට ගත්තට. ඒ වගේම මගේ සැමියා නිරෝෂන් සංජීව, අම්මා තාත්තා, නංගිට ස්තූති කරනවා.

The post හිට් වෙන්න ඕන නම් අඩනිරුවත් දේවල්වලට දායක වෙන්න appeared first on Gossip News | Rajagossip | Latest Gossip | ගොසිප් | rajagossip.lk - Raja Gossip.

Source Link : Gossip – Gossip News | Rajagossip | Latest Gossip | ගොසිප් | rajagossip.lk – Raja Gossip

ජීවිතේ අලුත් පිටුවක් පෙරළන්න ළඟයි නේද?
ඕනම කෙනෙක්ගේ ජීවිතේ දවෛනි උපත කිව්වොත් හරි. මගේ ජීවිතේ මෙච්චර කාලෙකට හැමදේම නිවැරදිව කරගන්න මට පුළුවන් වුණා. ඒ වගේ මගේ විවාහයත් නිසි කාලෙදි නිසි විදිහට කර ගන්න මම තීරණය කළා. තව මාස කිහිපයකින් මගේ විවාහය සිදු කිරීම සඳහා මේ දවස්වල කටයුතු සූදානම් කරමින් සිටිනවා. ඒ වගේම කලා ක්ෂේත්‍රයේ කටයුතුත් අඩුවක් නැතුව කරගෙන යනවා.

* ඔබේ පෙම්වතා ගැනත් විස්තර ටිකක් කියමු නේද?
ඔයාලා මගෙන් හැමදාම අහනවානේ මගේ පෙම්වතා ගැන. අද මම එයා ගැන ඔයාලට විස්තර කියන්නම්. මම නිළියක් වුණාට එයා ආරක්ෂක අංශයේ සේවය කරන කෙනෙක්. එයාගේ නම නුවන් ජීවන්ත. එයාගේ වෘත්තියයි මගේ වෘත්තියයි එකිනෙකට වෙනස් වුණාට එයා මේ ක්ෂේත්‍රය පිළිබඳව හොඳ අවබෝධයකින් ඉන්න කෙනෙක්.

* මේ ප්‍රේම සම්බන්ධතාව ආරම්භ වුණෙත් අහඹු විදිහට නේද?
මගේ හිතේ තිබුණා මුල ඉඳලම ආදර සම්බන්ධයකින් විවාහ වෙනවා කියන දේ. ඔහු මම මුලින්ම දැක්කේ නුවරදී. එතකොට එයා හිටියේ රාජකාරි කටයුත්තක. එයත් මාව දැකලා තිබුණා. එයා මම නෙතූ ප්‍රියංගිකා කියලා හඳුනාගෙන තිබුණා. පස්සේ ෆේස් බුක් එකේ මට කෙටි පණිවුඩයක් තියලා තිබුණා. ඊට පස්සේ ටික ටික කතා කරන්න ගත්තා. එයාට මාව විශේෂත්වයක් වෙලා තිබුණා වගේම මටත් එයාව දැකපු දවසෙ ඉඳලම විශේෂ කෙනෙක් වුණා.
අදටත් එයා කියන දෙයක් තමයි එයාට මාව ලැබුණේ මම රංගන ශිල්පිනියක් නිසා කියන දේ ඒ නිසාම එයා මගේ වැඩකටයුතුවලට මට හරියට උදව් කරනවා. අපේ ආදර කතාවට දැන් අවුරුදු හතරක් විතර වෙනවා.

* මේ ප්‍රේම කතාවට දෙන්නාගේම පවුල්වලින් අවසරය ලැබුණද?
මුල් කාලෙදි නම් ‍පොඩි ‍පොඩි අවවාද ලැබුණා. වෘත්තීය ක්ෂේත්‍ර දෙකක නිසා තමයි ඒ වගේ අවවාදයක් වුණත් කළේ. මුල් කාලෙදි මම වුණත් ටිකක් බය වුණා. මොකද මට එයාගේ රාජකාරියත් එක්ක ගැළපෙන්න පුළුවන් වෙයිද කියලා. ඒත් ටික කාලයක් යනකොට මම තේරුම් ගත්තා ආරක්ෂක අංශවල සේවය මොන වගේද කියන දේ. ඒ නිසා දැන් අපි දෙන්නා හොඳට තේරුම් අරගෙන ඉන්නේ. කෙටි කාලයකින් විවාහය කෙළවර කර ගන්නවට වඩා හොඳින් තේරුම් අරගෙන විවාහ ජීවිතයට ඇතුළත් වෙන එක තමයි වැදගත් වෙන්නේ.

* ඔබේ විවාහ උත්සවය වෙනස් විදිහට කරන්න සැලසුම් කරමින් ඉන්න බවක් ආරංචි වුණා. මොකක්ද වෙනස?
මම ගමක ඉපදුණ කෙල්ලෙක්. මගේ ගම පුස්සැල්ලාව. ගමේ හැමෝම මට හුඟක් ආදරෙයි. ඒ නිසා මම හිතුවා මගේ විවාහය ලස්සනට ගමේ කරන්න ඕන කියලා. මගේ පෙම්වතාත් ගෙදර අයත් ඊට කැමැති වුණා. මම අවුරුදු ගාණක් ඉන්නෙ කොළඹ නිසා මගේ කලා ක්ෂේත්‍රයේ යහළු යෙහෙළියෝ හැමෝටමත් මගේ විවාහ උත්සවයට ආරාධනා කරනවා. දුර වැඩි නිසා සමහර කාර්යබහුල යහළු යෙහෙළියන්ට සහභාගි වෙන්න බැරි වුණත් මම තරහ වෙන්නෙ නැහැ.

* විවාහයෙන් පසුව කලා කටයුතු සීමා වෙයිද?
නැහැ. කලා කටයුතු නම් සීමා කරන්නෙ නැහැ. මම නතර කළත් මගේ පෙම්වතා මාව උනන්දු කරනවා. නමුත් ඉතින් තවත් වසර කිහිපයක් යනකොට යම් යම් සීමා මමම ඇති කර ගන්න ඉඩ තියෙනවා. විවාහයත් සමග ඕනම කෙනෙක් මව් පදවිය බලා‍පොරොත්තු වෙනවානේ. තවත් අවුරුද්දක් දෙකක් යනකොට ඒ වගේ කාර්යබහුල වෙන්න ඉඩ තියෙනවා.

* වර්තමාන කලා කටයුතු පිළිබඳවත් කතා කරමු නේද?
දැනට එක ටෙලි නාට්‍යයක් විකාශනය වෙනවා. තවත් හොඳ චරිත කිහිපයක් සඳහා රංගනයෙන් දායක වුණු ටෙලි නාට්‍ය කිහිපයක් ඉදිරියට එන්න තියෙනවා. ඒ අතරත් ධරණි කියන ටෙලි නාට්‍යයේ චරිතය මා ඉතා ආසාවෙන් කළ චරිතයක්. ඊට අමතරව මේ දවස්වල විදෙස් නිෂ්පාදනයක් ලෙස ලංකාවේ රූගත කෙරෙන චිත්‍රපටයක රඟපෑම් කටයුතු සිදු කෙරෙනවා. ඊටත් අමතරව මේ දවස්වල මා රඟපෑ ඇලඩින් සහ පුදුම පහන චිත්‍රපටය විකාශය වෙනවා. ඒ වගේම මම ඉතාම ඉක්මනට මගේ විවාහ උත්සවයේ ඡායාරූපයක් රසිකයන්ට බලන්න දෙනවා කියලා කියන්න කැමැතියි.

නෙරංජලා වික්‍රමසිංහ

The post හදිසියේ බැඳලා ඉක්මනට ඩිවෝස් වෙන්න මට ඕනෙ නෑ appeared first on Gossip News | Rajagossip | Latest Gossip | ගොසිප් | rajagossip.lk - Raja Gossip.

Source Link : Gossip – Gossip News | Rajagossip | Latest Gossip | ගොසිප් | rajagossip.lk – Raja Gossip