ප්‍රේමවන්තයා තිලිණ කල අපූරු තෑග්ග

මට තාමත් මතකයි මේ වත්සලා කියන තරුණිය. ඇය ගැටවර වියේ සිටි යුවතියක්. ඇය ප‍්‍රතිකාර ලබා ගැනීමට පැමිණයේ තනියම. ඇය හිස පීරලා සිටියේ නැහැ. මුහුණත් විඩාබරයි. බැලූ බැල්මටම ඇය මනස අවුල් වූ යුවතියක් ලෙස පෙනී ගියා. ඇය මා ඉදිරියේ වාඩිවෙලා ඇගේ අතේ තිබුණ ලිපිය මට දුන්නා. එය මීගමුව රෝහලේ ලිංගික රෝග සම්බන්ධ වෛද්‍යතුමා මට යොමු කළ ලිපියක්. ඒ ලිපියේ මෙසේ සඳහන් වෙලා තිබුණා.

මේ ලිපිය රැගෙන එන වත්සලාට අවුරුදු 18 යි. ඇය අවිවාහකයි. ඇය වෛද්‍ය වාට්ටුවේ සතියක් ප‍්‍රතිකාර ලැබුවා. ඇය වෛද්‍ය ප‍්‍රතිකාර ලැබුවේ වස වර්ගයක් පානය කර ජීවිතය නැති කරගන්න උත්සාහ කළ පසුවයි. ඇය අපට යොමු කළේ ඇයගේ ලිංගික ප‍්‍රදේශයේ යම් බිබිලි වර්ගයක් දක්නට ලැබුණ නිසයි. අපි ඇය පරීක්ෂා කළා. ඇය හර්පීස් කියන ලිංගික රෝගයට ගොදුරු වෙලා තිබුණා. හර්පීස් රෝගය නිට්ටාවට සුව කරන්න බැහැ. මේ හේතුව නිසා ඇති වූ කම්පනයට ඇය ජීවිතය නැති කර ගන්න උත්සහ කරනවා. ඇය දැඩි මානසික පීඩයනයකින් පෙළෙන බව පෙනෙනවා. ඔබතුමාගේ අවධානය යොමු කරන්න.

මේ ලිපිය මා හොඳින් කියෙව්වා. පසුව මා ඇගේ ඇස් දෙක දිහා බැලුවා. ඒ ඇස් දෙකේ කඳුළු පිරිලා තිබුණා. ඇය දුකින් බලාගෙන මගෙන් මෙහෙම ඇහුවා. ඩොක්ටර් මගේ මේ රෝගය සුව කරන්න බැරිද? මම හරිම පව්කාරයි. මට ජීවිතය එපාවෙලා තියෙන්නේ. ඇයි මට මැරෙන්න නොදුන්නේ. මම ගෙදර ගියත් කොහොමත් මැරෙනවා. මම ඇගේ කතාව කියන්න කියලා කිව්වා. මෙන්න ඒ කතාව.

මේක සිදුවුණේ මම උසස් පෙළ පන්තියේ ඉගෙනුම ලබන කාලයේ. මම නිවාඩු දවස්වල බාහිර පංතියකට යනවා. පන්ති ඉවරවෙලා එද්දි හවස් වෙනවා. එදත් පන්ති ඉවරවෙලා අපේ ගමට යන බස් එක එනකම් බස් හෝල්ට් එකේ හිටියා. මා ඉන්නකොට මට එහායින් රත‍්‍රන් පොරවා ගත්තු ලස්සන තරුණයෙක් මා දිහා බල බලා ඉන්නවා දැක්කා. ඒත් මම ඔහුව නොදැක්කා වගේ අහක බලාගෙන හිටියා. මම යන බස් එක ආවා.

මම ඉක්මනට බස් එකට නැගලා වාඩිවුණා. අර තරැණයත් බස් එකට නැගලා මගේ ළඟින්ම වාඩිවුණා. ඔහු මා දිහා නිතරම බලනවා. ඔහු ලස්සනයි. ඔහු මට කතා කළා. මම ලස්සනයි කිව්වා. ඔහුගේ විස්තරත් කියන්න පටන් ගත්තා. ඔහු ඉතාලියේ ඉන්න බවත්, ඔහුට ගොඩක් මුදල් ඇති බවත් පැවසුවා. ඒ වගේම මගෙන් යාළුවෙන්නත් ඇහුවා. මට ගොඩක් බය හිතුණා. අදම මුණ ගැහුණ ඔහු ඇයි අදම මගෙන් යාළුවෙන්න ඇහුවේ කියලා හිතද්දි පුදුම හිතුණා. අම්මත් නැති පාළුවේ තනිකමේ ජීවිතය ගෙවන මට ඒ හමුවීම පුංචි සතුටකුත් ගෙනාවා. ඒත් ඒ සතුට මම සඟවා ගත්තා ඔහුට කිසිවක්ම කිව්වේ නෑ.

අවාසනාවකට මේ පුද්ගලයා දෙවැනි දවසෙත් බස් හෝල්ට් එකේ හිටියා. ඔහු මට කතා කළා. මොනවා හරි බොන්න යන්න යෝජනා කළා. යෝජනාව මට ප‍්‍රතික්ෂේප කරන්න බැරිවුණා. මම ඔහුත් සමඟ ගියා. ඔහු මාව හෝටලයකට එක්කන් ගියා. මම අහිංසකයි, අසරණයි කියලා ඔහුට දැනෙන්න ඇති. ඔහු මාව කාමරයකට එක්කන් ගියා. මට මගේ ගෞරවය නැති වුණා. මම ගැහැණියක් වුණා. ඒ විදිහට ඔහු මාව කීප වතාවක්ම හොටෙල්වලට එක්කන් ගියා. මාස දෙකක් විතර ඒ විදිහට ගෙවිලා ගියා. ඒත් මුලින් මාව විවාහ කර ගන්නවා කියූ ඔහු විවාහය ගැන කතා කරන්න අකමැති වුණා.

හිටි හැටියේම ඔහු අතුරැදහන් වුණා. ඔහුව හොයා ගන්න බැරිවුණා. ඔහුගේ දුරකථනය විසන්ධි වෙලා. ඔහුට කතා කරන්න අනේක වාරයක් උත්සාහ ගත්තා ඇත්තටම මේ මොකද වුණේ කියලා මට හිතා ගන්න බැරිවුණා. ඔය ඉන්න අතරේ මට උණ හැදුනා. හිසේ කැක්කුම ආවා. යෝනි ප‍්‍රදේශයේ බිබිලි වගයක් හැදිලා. ලොකු වේදනාවක් දැනුණා. මේවා පැහැවලා සැරව ආවා. ඒත් එක්ක ලේත් ආවා. මම හොඳටම බය වුණා. කාට කියන්නද? මං ගොඩක් අසරණ වුණා. ඒ නිසා කාටවත්ම නොකියා වෛද්‍යවරයකු හමුවුණා. තාත්තාට බොරැ කියලා සල්ලි ඉල්ලා ගත්තා. වෛද්‍යවරයා කිව්වේ මෙය ලොකු අසනීපයක් බව. ඒ වගේම මෙය සුව කළ නොහැකි බවත් කිව්වා. මට ලිංගික රෝග සම්බන්ධ වෛද්‍යවරයෙක් මුණ ගැසීමට උපදෙස් දුන්නා.

මම එකපාරටම වෛද්‍යවරයෙක් මුණ ගැහීමට ගියේ නෑ. මං ගොඩක් කල්පනා කළා. මට මෙහෙම වෙන්න හේතුව කුමක්ද? ඇයි මම දවසක් දෙකක් දැකපු තරුණයෙකුට රැවටුණේ. ඇයි මම ඔහුව ප‍්‍රතික්ෂේප නොකළේ. මගේ හිත මගෙන්ම ප‍්‍රශ්න ඇහුවා. මට අම්මත් එක්කත් තාත්තා එක්කත් තරහක් ඇති වුණා. මගේ ප‍්‍රශ්න කියන්න මට ආදරේ කරන්න කවුරුවත් හිටියේ නෑ. තාත්තා හිටියේ වැඩ කරලා සල්ලි හම්බ කරන ලෝකයක. අම්මා අවුරුදු හයක වගේ කාලයක සිටම අප ළඟ හිටියේ නැහැ. මගේ අසරණකම නිසාම මං මීට ගොදුරු වුණා කියලා මට හිතුණා.

මේ දේවල් හිතලම මට ජීවිතේ එපා වුණා. නින්ද ගියේ නෑ. කෑම කන්න බැරිවුණා. ඇඟට පණ නැති වුණා. කිසිම වැඩක් කරන්න ආශාවක් නැතිවුණා. වෙනදා හොඳට පාඩම් කරපු මට පාඩම් කරන්න බැරිවුණා. මට මැරුණොත් හොඳයි කියලා හිතුනා. ඒ නිසා දවසක් මා මැරෙන්න තීරණය කරලා වස බිව්වා. ඊටපස්සේ තමයි රෝහලට ගෙන ආවේ. වෛද්‍යවරු ගොඩක් මහන්සිවෙලා මාව සනීප කළා.

එහිදී ඔවුන් දැනගත්තා මට හර්පීස් කියන රෝගය වැළඳී ඇති බව. මගේ හිතේ පීඩනය තවත් වැඩිවුණා. මේ රෝගය කවදාවත් සුවපත් කළ නොහැකි බවත්, එය යටපත් කර පමණක් තබාගත හැකි බවත් දැනගත්තා. ඒ වගේම කවදාක හරි දරැවෙක් ලැබෙන විට ඒ දරුවටත් රෝගය යා හැකි බව දැන ගත්තා. මං තවත් අසරණ වුණා. මට ආයෙමත් මැරෙන්න හිතුණා. එය දැනගෙන තමයි වෛද්‍යවරැ මාව මෙතනට යොමු කළේ.

ඇගේ කතාව අසා සිටි අපි ඇයව හොඳින් පරීක්ෂා කළා. ඇය දැඩි මානසික අවපීඩන තත්ත්වයට පත්වෙලා හිටියා. මානසික අවපීඩනයේ ලක්ෂණය තමයි ජීවිතය නැති කර ගැනීමට සිතිවිලි ඇතිකර ගැනීම ඒ කියන්නේ එවැනි අය විශාදිය කියන තත්ත්වයට ගොදුරු වෙනවා. විශාදිය හැදෙන අයකුගේ මොළයේ රසායනික වෙනසක් සිදුවෙනවා. මේ අයට මානසික ප‍්‍රතිකාර කර ජීවිතය නැති කර ගැනීමේ අවශ්‍යතාව ඉවත් කළ යුතුයි. ඊට පසුව ජීවත්වීමේ ආශාව ඇති කළ යුතුයි.

දෙවනි අවස්ථාවේදී ඔළුව නිරාකරණය කර ගැනීමේ හැකියාව වර්ධනය කර දිය යුතුයි. එහිදී මනස විවෘත කර ගැටලුව අවබෝධ කර ගැනීමටත් එවැනි රෝගයක් සමඟ ජීවිතය දෙස ධනාත්මකව බලන්නේ කෙසේද යන්නත් පැහැදිලි කර දිය යුතුයි. මෙහිදී අප මැයට හර්පීස් රෝගය ප‍්‍රතිකාර මගින් පාලනය කරන්නේ කෙසේද? හොඳ විවාහ ජීවිතයක් ගතකිරීම හා දරුවාට ආරක්ෂාකාරී ලෙස උපතක් ලබාදීම පිළිබඳ දැනුම්වත් කිරීම් කළා.

මෙවැනි රෝග තියෙන අයෙක් අනිවාර්යයෙන්ම සිසේරියන් සැත්කමකට යා යුතු වෙනවා. හේතුව යෝනි මාර්ගයේ ඇති මේ විෂබීජ දරැවාට හානියක් විය හැකි නිසා. මේ කරැණු පිළිබඳ අප ඇයට අවබෝධයක් ලබා දුන්නා. ජීවත්වීමේ වටිනාකම, ජීවිතයේ ඉදිරියට යා හැකි බව, ඇගේ හැකියාවත් අප පෙන්වා දුන්නා. ඇය වෙනස්වෙලා ආයෙත් උසස් පෙළ කළා. ඇය දැන් උසස් රැකියාවක් කරනවා. ඇයට මේ සියලු දේ දත් පෙම්වතෙකුත් ඉන්නවා. ජීවිතය දෙස ධනාත්මකව බැලීමට ඇයට අප කියලා දුන්නා. උපදේශනයේදී සිදු වන්නේ එයයි. මෙවැනි අයට අප ප‍්‍රතිකාර කරනවා වගේම වැඩිහිටි අයට සිතීමටත් දෙයක් තියනවා.

අද තියෙන්නේ විෂය මූලික වෙච්ච ඒකාකාරී අධ්‍යාපන රටාවක්. ඒකෙන් දරුවන්ගේ ප‍්‍රශ්න දරා ගැනීමේ හැකියාව අඩුවෙලා තියෙනවා. ලෝක සෞඛ්‍ය සංවිධානය කියනවා දරුවන්ට පුංචි කාලයේ සිටම ගැටලු විසඳාගෙන ප‍්‍රශ්න නිරාකරණය කර ගැනීමට පුරුදු කළ යුතු බව. එය ඉතාමත්ම වැදගත්. කොච්චර ඉගෙන ගත්තත් ජීවිතේ සාර්ථක කර ගන්න බෑ ජීවන කුසලතා ජීවිතයට ඇතුළත් කර ගත්තේ නැත්නම්. මේ කුසලතා වර්ධනය වෙන්න මව්පියෝ දරුවෝ ළඟ ඉන්න  ඕන. සල්ලිවලින් ගන්න බැරි ගොඩක් දේ ආදරය, අගය කිරීම මඟින් දරැවන්ට දෙන්න පුළුවන්.

මේ පිළිබඳව මනෝ විද්‍යාඥයෝ පරීක්ෂා කරලා තියෙනවා. දරැවා පුංචි කාලයේදී හැඟීම් බෙදා ගැනීම, ප‍්‍රශ්න සාකච්ඡා කිරීම, ඔහුගේ අදහස් ප‍්‍රකාශනයට ඉඩ ප‍්‍රස්ථා ලබාදීම, ඔවුන් අගය කිරීම හා ආරක්ෂාව ලබාදීම මඟින් ඔවුන්ට හොඳ පෞරැෂයක් ගොඩනැගෙනවා. ඒ මඟින් ඔවුන්ගේ ජීවිත ලස්සන වෙනවා යන්න ඔවුන් සොයාගත් පැහැදිලි සත්‍යයක්.

කිරිබත්ගොඩ මූලික රෝහලේ මනෝ වෛද්‍ය නයනානන්ද කුමාරනායක
ලිපි මුලාශ්‍රය – දේශය පුවත්පත

Source Link : Wishma Lokaya

රහස් ප‍්‍රදේශය සිපගන්නව නම් මේ ගැනත් අනිවාර්යයෙන් දැනගන්න.

තම සහකරු හෝ සහකාරියගේ රහස් ප‍්‍රදේශයන් සිප ගැනීමට පෙර සැලකිය යුතු කරුණු කිහිපයක් තිඛෙනවා. මන්ද ලිංගික කි‍්‍රයාවලියේදී සිප ගැනීම් සුළබ උවත් ලිංගික සෞඛ්‍ය ගැනද දැනුවත් වීම අත්‍යාවශ්‍ය දෙයකි. කෙසේ නමුත් ඔබ ලිංගිකව එක්වන අවස්ථාවල රහස් ප‍්‍රදේශයන් සිපයන්නේ නම් මේ කරුණු ගැන වැඩි අවධානයක් යොමු කිරීමෙන් ඔබට සෞඛ්‍ය සම්පන්න ලිංගික ජීවිතයක් හිමිවනු ඇත.

ලිංගික අවයවයන් හොදින් පිරිසිදු කරන්න රහස් ප‍්‍රදේශයන් නැතහොත් ලිංගික අවයවයන් යනු ශරීරයේ ඉතාම පිරිසිදුව තබාගත යුතු ස්ථාන වනවා.

නමුත් බොහෝ දෙනා ඒ පිළිබදව එතරම් අවධානයක් දක්වන්නේ නැහැ. ලිංගික අවයවයන් යනු වැඩි වශයෙන් විෂබීජ රැදෙන ස්ථානයක් බැවින් එම ස්ථාන සැරෙන් අඩු සබන් වර්ගයක් භාවිතා කර හොදින් සෝදා ගැනීම අනිවාර්ය වෙනවා.

රෝම ඉවත් කරන්න ලිංගික අවයව වල වැවී ඇති රෝම මසකට වරක් හෝ කපා ඉවත් කිරීම හෝ පාලනය කිරීම වඩාත් සුදුසු වනවා.

දෑත් පිරිසිදු කරන්න ලිංගික අවයවයන් ඇල්ලීමට පෙර හොදින් දෑත් පිරිසිදු කරන්න. විෂබීජ සහිත දෑතින් ඇල්ලීමෙන් විවිධ කෘෂ්ට රෝග ඇතිවීමේ අවධානමක් පවතිනවා. කිසිවිටකත් ගුද මාර්ගය ඇල්ලී අතකින් නැවතත් ලිංගික අවයවයන් ඇල්ලීමක් සිදුකිරීම නුසුදුසු වනවා.

අතර්ජාලයෙන් උපුටා ගැනීමකි

Source Link : Sakwala

කොන්දොස්තරගෙන් රුපියල ඉල්ල හැඬූ අම්මාට රණවිරුවා මුළු පඩියම දන්දෙයි

30 වසරක යුධ බිය තුරන් කරපු රණවිරුවා ගැන දැන් කතාවෙන්නේ ගොඩක් අඩුවෙන් වුණාට ඇත්තටම අපි කතා කළ යුත්තේ ඔහු ගැනයි. ඒ ඔවුන් ගැනවත් නොහිතා රට වෙනුවෙන් අපි වෙනුවෙන් ඔවුන් ඔවුන්ගේ ජීවිතය පවා පූජා කරන්න ඉදිරිපත් වුණ නිසායි. ඒ වගේම තමයි අපි මේ කියන්න යන කතාවෙන් ඔබට වැටහෙයි අවුරුදු 30 ක් තිස්සේ අපිව යුද්ධයකින් ගලවාගත්ත රණවිරුවා ඔවුන්ගේ සේවය අවසන් කර නොමැති බව.

මේ කියන්න යන්නේ මුහුණුපොතේ හුවමාරු වූ කතාවක් ගැන. මේ කතාව කියවන් යද්දි ඔබට තේරෙයි රණවිරුවා කියන්නේ ඇත්තටම ජාතියේ පිනට මිනිස්සුන්ගේ පිනට පහළ වූ දෙවියෙක් කියලා. මේ එම සටහනයි. හැබැයි මේ තවත් එක් බස් කතාවක්ම නොවෙයි!

රුපියලකට නාහෙන් අඬපු අම්මා – දුක හිතෙන අය කියවන්න එපා

පොඩි පොදයකුත් තිබුණා.. පාන්දර නිසා සීතලත් එක්ක. අඳුරු පැහැ ගත් පරිසරය කෑම සොයන් යන කුරුල්ලන්ගෙන් වර්ණවත් වෙලා.. ටවුන් එකේනම් සුපුරුදු කාර්‍යබහුලත්වය එහෙමමයි. හෙමින් හෙමින් ගාල්ල බස් නැවතුමට පයින්ම කොටපු මගේ ඇගේ සීතලටම හිරිගඩුත් පිපිලා.. ත්‍රී වීල් එකේ අයියා කෙනෙක් හොරාටම සිගරට් එකක් අදිනවා.. කවදාවත් බුලත් විටක්වත් කාපු නැති මට, මේ හීතලට ඒ සිගරට් එකේ අමුතු ආතල් එකක් ඇති කියලත් හිතුනා.

මම හිටියේ මාතරට යන්න. ඉක්මනට යන්න ඕන නිසා දුර ටර්න් එකක් ගන්න පාර අයිනට ආවා.. වෙලාවටම මම ආසම ටර්න් එක තියෙනවා. තංගල්ල ත්‍රිකුණාමලය.. ටිකක් සෙනඟ හිටියත් ඉක්මනට යන නිසා ඒක ප්‍රශ්නයක් වුණේ නෑ..

විනාඩි විස්සක් විතර බසය මාතර දෙසට ඇදුනා.එක තැනකින් අම්මා කෙනෙක් බස් එකට නැග්ගා.. ඒ මනුස්සයා ටිකක් වයසයි. මටනම් අපේ ආච්චි වගේ.. එයා හෙමින් බස් එකට ගොඩ වුණේ.. එයාට නැගගන්න අමාරුයි. ඒ එක්කම ඉස්සරහ දොරටුවෙන් කොන්දොස්තර අයියගේ කටහඬ ඇහුනා.

“ඉක්මනට නගිනවා මනුස්සයෝ.. පරක්කු වෙනවා” මම හිටියේ පස්සේ ෆුට් බෝර්ඩ් එක ලඟමයි. මම ඒ අම්මගේ අතින් අල්ලලා උඩට නග්ගගත්තා.. ඒ මනුස්සයා හරි දුර්වලයි. මට අතින් ඇල්ලුවම කටු ටිකයි නහර ටිකයි විතරයි අහු වුණේ..

මොනා වුනත් ඒ මනුස්සයට ශීට් එකක් දෙන්න කෙනෙක් හිටියේ නෑ.. කොන්දොස්තරත් ලඟට ආවා. ඒ අම්මගෙන් ටිකට් ඉල්ලුවා. රු 10 කොලයක් දීලා ටිකට් එකක් ඉල්ලුවා.. කොන්දොස්තරත් ටිකට් එකක් දුන්නා. ඒත් එක්කම අම්මගේ කටහඬ ආයේ අවදි වුණා.

“පුතේ තව රුපියලක් එන්න ඕන මට. රුපියල් නමයයි නේද ගාන?”

“මාරු නෑ. ඕනනම් නමයක් දෙන්න මට”

මම ලඟත් නෑ. මට රුපියල ඕන.. ඒ මනුස්සයා කොන්දොස්තරට ටිකක් තදින් කිව්වා..

වයසක ගෑණු ඔහොමමයි. මට හිතින්ම කියවුණා. පුදුම තන්හාවක්..

බස් එකේ එක කාලගෝට්ටියයි. අම්මා රුපියල ඉල්ලනවා. කොන්දොස්තර බනිනවා.. මිනිස්සු හිනා වෙනවා..

ඒ අතරේ මම ලඟම හිටගෙන ඉඳපු කොන්ඩේ නෝට් කපපු අයියා කෙනෙක් රුපියලක් දෙනවා මේ අම්මට..

අනේ.. අම්මගේ මූණට හිනාවක් ආවා..

මේ රුපියල දීපු අයියා ඒ අම්මගෙන් ඇහුවා මොකටද රුපියල කියලා.. ඒ අම්මා කියපු කතාවට තාම මගේ පපුව කීන් ගානවා.

“මම මේ යන්නේ මගේ මහත්තයා බලන්න පුතේ. එයාට හරියට ඇවිදින්නත් බෑ.මම ඉන්නේ මගේ දුව ලඟ. අපට ඉන්නේ ඒකි විතරයි. තාත්තා ලඟ ගඳයි, අපිරිසිදුයි කියලා මගේ දුව මගේ මහත්තයා ගෙදරට ගන්නේ නෑ.. එයාව මට බලන්න යන්නත් එපා කියලා තියෙන්නේ.. මම කොහොමද මහත්තයෝ මගේ මිනිහා අත ඇරලා දාලා හුස්ම පොදක් ගන්නේ? එයා ඉන්නේ මේ කිට්ටුව.

මම අද උදේට කෑවේ නෑ මහත්තයෝ. ඒක ඔතාගෙන ආවා මගේ මිනිහට. පව් එයා කඩාවැටුන ගෙදරක තනියම විඳවනවා. එයාට අසනීපයි. දුව එයාට රුපියලක්වත් වියදම් කරන්නේ නෑ. මට සල්ලි දෙන්නෙත් නෑ එයාට වියදම් කරයි කියලා. මම ලඟ තිබුනේ රුපියල් 18යි මහත්තයෝ. ඒකත් මුණුබුරාට වැඳලා වැඳලා ඉල්ලගත්තේ. මට මේ රුපියල ඉල්ලගත්තේ නැත්නම් මට ආයේ එන්න වෙන්නේ නෑ. එහෙම වුනොත් මගේ මහත්තයට මෙහෙමවත් කෑම වේලක් දෙන්න වෙන්නේ නෑ මට.”

මම මටම සාප කරගත්තා. මමත් හිතින් මේ අම්මට බැන්නා නේද කියලා..

ඒ එක්කම අර කොන්ඩේ නෝට් කපපු අයියා පර්ස් එක අරගෙන ගණන් කරලම පන්දාහේ කොල නවයක් අර අම්මගේ අතට දුන්නා..

“මේක තියාගෙන තාත්තව සනීප කරගන්න අම්මේ”

“අනේ ගොඩක් පින් මහත්තයෝ” ඒ අම්මා කිව්වා..

ඒ අම්මා දන්නේ නැතිව ඇති ඒ දුන්නේ පන්දාහේ කොල කියලවත්..

ඒත් මම හිතුවා මේ ලොකු සල්ලි කාරයෙක් කියලා.. කිසි ගානක් නැතිව සල්ලි දීපු නිසා..

මම නිකමට ඒ අයියගෙන් ඇහුවා

“පව් නේද අයියේ? අයියා කොහේද වැඩ කරන්නේ?”

මම ශ්‍රී ලංකා යුධ හමුදාවේ මල්ලි. මේ මගේ මාසේ පඩිය. අද මම මේ ගමේ යන ගමන්. මගෙත් අම්මා නෑ මල්ලි. අම්මා නැතිවුනාට පස්සේ මට මේ ජොබ් එක සෙට් වුණේ. ඒකෙන් මට මගේ අම්මට හරියට සලකගන්න බැරිවුණා.. ඒත් අදනම් හිතට මාර ෆිට්..

මට ඉක්මනට කඳුළු එන කෙනෙක්. ඒත් වැටෙන්න නොඳී දරාගෙන හිටියේ අර අම්මා හිටගෙන බස් එකේ ශීට් එක බදාගෙන යනවටත් වඩා අමාරුවෙන්..

තව දෙයක්.. අපි කියන්නේ ආමි එකේ කොල්ලෙක් කියලා.. එයාලා කියන්නේ මම වැඩ කරන්නේ හමුදාවේ කියලා.. ඒත් මේ අයියා මට කිව්වේ, එයා වැඩ කරන්නේ ශ්‍රී ලංකා යුධ හමුදාවේ කියලා..

ඒ වචන ඇතුලෙම තිබුණා පෞරුෂය තේජාන්විතකම ගෞරවය හා විනය!

ඔබට ස්තූතියි නොහඳුනන සහෝදරයා!
– උන්මාදකරු –

Source Link : Wishma Lokaya

සැමියාගෙන් නොලැබෙන ප්‍රේමය සොයා යන සල්ලිකාර නෝනලා

මීට වසර කිහිපයකට පෙර ඉන්දියාවේ නිෂ්පාදිත ඬේසි බොයිස් (Desi Boys) ලංකාවේ බොහෝ අය නරඹා නොමැති චිත්‍රපටයක් විය හැක. නමුත් එහි අන්තර්ගතය යුරෝපය, ඇමෙරිකාව ඇතුළු සුපිරි රටවල සංස්කෘතියේ එක් කොටසකි. පිරිමින් විසින් ගණිකාවක් සොයා යන වේගයට හා ලොල්කම තරමටම ගැහැණුන් විසින් පිරිමි ගණිකාවක් සොයා යන්නේ නැත. ලංකාවේ ප්‍රසිද්ධ නොවුනත් Desi Boys සහ Dancing Bear වැනි සංකල්ප සුපිරි රටවල නිල වශයෙන් සම්මතව කරගෙන යන ඒවාය.

නමුත් ලංකාවේ මෙහි අනිත් පැත්ත එනම් පිරිමි අය සාදවලට නිරුවත් තරුණියන් ගෙන්වා රංගන සිදුකරති. සුපිරි රටවල ප්‍රසිද්ධ නමුත් ලංකාවේ ඉතාමත් හොර රහසේ දැඩි රැකවල් මැද පිරිමින්ගේ ආදරය ලබා ගන්නා විවාහක කතුන් සහ වයස ඉක්මවූ අවිවාහක කතුන් බොහොමයක් සිටින බව ඔබට රහසක් වුවත් වයස 25ට අඩු ගැටවර වියේ කොල්ලන්ට නම් නොරහසකි.

සැමියා වෙනත් රටක සේවය කරන හෝ සති අන්තයේ පමණක් ගෙදරට එන සහ රෑබෝවී ගෙදරට එන සැමියන් සිටින කාන්තාවන් බොහෝමයක් මෙම වසංගතයට හසුවී හමාරය. විශේෂයෙන් මොන්ටිසෝරියට දරුවන් ගෙනයන සමහර කාන්තාවන් එම නිදහස් පැය කිහිපයේ වෙනත් රති සුව ලබනු පිණිස මගතොටේ යන කොල්ලන් ඇදබැද ගනියි.

ඬේසි බෝයිස් සංකල්පයට අනුව අප විසින් කාන්තාවන් ආකර්ෂනය කරගන්නා දැන්වීමක් අදාළ දුරකථන අංක හා විස්තර සමගින් මුහුණ පොත තුළ තිබෙන විශේෂ කණ්ඩායම් (Face book Group) තුළ පළකරන ලදී. දින දෙකක් පමණ ගතවනවිට අපට ඊට පිළිතුරක් ලැබුණි. කොහුවල ප්‍රදේශයේ සුපිරි ජීවන රටාවක් ගතකරන ෂර්මිලා යනු තිස්පස් වියැති එක් දරු මවකි. අප පිළිබඳ විශ්වාසය තහවුරු කරගනු වස් දින කිහිපයක් ඇය අප හා දුරකථනය හරහා දොඩමළු වූවාය.

කෙසේ හෝ කතිකා කරගත් පරිදි සතියේ දිනක උදෑසන 9ට පමණ ඇගේ නිවසට එන ලෙස අපගේ කෙනෙකුට ඇය දැන්වූවාය. ඒ අනුව නියමිත වෙලාවට නියමිත පරිදි ඔහු එම නිවසට ගියේය. සුඛෝපභෝගී නිවාස පිරි එම පටුමග සැබැවින්ම සුපිරි සල්ලිකාර මිනිසුන්ගේය. ශර්මිලා කී පරිදි ඔහු ඇගේ නිවස ඉදිරියට ගියේය. ගේට්ටුව අසල කැමරාවක් තිබෙන අතර ඒ අසලවූ මයික්‍රෆෝනයෙන් ඔහු ආ බව දැන්වූ විගසම ගේට්ටුව ස්වයංක්‍රිීයව විවෘත වුණා. පසුව ඔහු ඇතුළට ගියවිගස ගේට්ටුව නැවතත් වැසුණි. ඉතා අලංකාර සුවිසල් නිවසක් වූ එහි සුපිරි මෝටර් රථයක් ද නවත්වා තිබුණි.

රාත්‍රී ඇඳුමින්ම සැරසී දොර විවර කර අප සගයාව ඇතුළට ගත්තේ ශර්මිලාය. ශර්මිලා යනු නිතැනින්ම නෙත් ඇද ගන්නා සුරූපී කාන්තාවකි. සමාගමක ධනවත් සමූහ අධ්‍යක්ෂකවරයෙකුගේ බිරිඳ වන ඇය විවාහ වී වසර 6ක් පමණ විය. සැමියා ඇයට වඩා දස වසරකින් වැඩිමල් තරමක් පෘස්ථුල ශරීරයක් හිමි අයෙකු විය. මෙම වෙලාව වනවිට ඇය පමණක් තනිවම නිවසේ ගත කරයි. සේවිකාවද එළියට යවා ඇති අතර නැවත සේවිකාව සහ ඇගේ දරුවා නිවසට එන්නේ දහවල් 12.30ට පමණ බව ඇය පැවසුවාය.

ෂර්මිලා සමඟ යහන්ගත වීමට ඇය ඔහුට ඇරයුම් කරන ලදී. නමුත් ඔහුට ඊට එකඟ වීමට නොහැකි විය. නමුත් ඔහු සූක්ෂම ලෙස ඇගෙන් මෙවැනි දෙයක් කිරීමට පෙළඹෙන්නේ ඇයි දැයි ඇතුළු විස්තර අසාගන්නා ලදී. “මගේ මනුස්සයාට බිස්නස් විතරයි එයාගේ ලෝකෙ. සල්ලිකාරයෙක් නිසයි මාත් කසාද බැන්දේ. හැබැයි ගෙදරට වෙලා නිකං ඉන්න කම්මැලි නිසයි හොරෙන් ඔයාලා වගේ අයව හොයාගන්නේ. උදෙන්ම ඔෆිස් යන එයා එන්නේ රෑ වෙලා. මට කිසි සතුටක් ලැබෙන්නේ නැහැ. මීට කලින් කොල්ලො අට දෙනෙක් එක්ක විතර මං ගිහිල්ලා තියෙනවා.

ගෙදරටම ගෙන්ව ගන්න එක තමයි ආරක්ෂාකාරී. කැම්පස් කොල්ලෙක් සෙට් කරගෙන අන්තිමට මම එයාට මෝටර් බයික් එකකුත් අරන් දුන්නා. ස්මාර්ට් ෆෝන්, ලැප්ටොප් එහෙමත් දීලා තියෙනවා හොඳට සලකපු කොල්ලන්ට මං.” කියා ඇය බොහෝ විස්තර කියවන ලදී. කෙසේ නමුත් ඇයගෙන් බේරි පැමිණි සගයා ඇගේ දුරකථන අංකයද මකා දමා ඇත.

කෙටියෙන් කියතොත් මෙවැනි කාන්තාවන් බොහෝමයක් කොළඹ හා තදාසන්න ප්‍රදේශවල වාසය කරති. අන්තර්ජාලයේ එවැනි කාර්යයන් සඳහාම වෙන්වූ වෙබ්අඩවි තුළ මෙවැනි විස්තර බොහෝමයක් ඇත. කෙසේ හෝ අපගේ දුරකථන අංකයට තවත් කාන්තාවක් සම්බන්ධ වුණි. ඇගේ සැමියා කොළඹින් පිට සේවය කරන්නෙකි. බොහෝ විට සතියේ දිනවල දහවල් කාලයපුරාවට ඇය තනිවම නිවසේ වාසය කරන්නියකි. ඇය වයස 42ක් පමණ වූ අතර කාමාශාවට දැඩි ගිජු තැනැත්තියකි. කෙසේ හෝ එම ක්‍රමයෙන් අප හට ඇමතූ යම් පිරිසක් වූහ. ඔවුන් බොහෝමයක් විවාහක කාන්තාවෝ වූහ. ඇතැමුන් 10 වැනි ශ්‍රේණියේ පමණ ඉගෙනුම ලබන දරුවන්  සිටින්නියන්ය.

පානදුර ප්‍රදේශයේ පදිංචි නිසල් යනු පුද්ගලික වාණිජ බැංකුවක සේවය කරන 23 වියැති තරුණයෙක් විය. ඔහුගේ ගෙවල්වලට තරමක් නුදුරින් ජීවිත්වන කාන්තාවක් සමඟ මොහු සම්බන්ධ විය. ඇගේ සැමියා පිටරටක  සේවය කරන අතර එකම පුතු පළමු ශ්‍රේණියේ ඉගෙනුම ලබයි. ඇගේ මායම්වලට අසුවුණු නිසල් ඇයට අවශ්‍ය පරිදි ඇය සමඟ ගතකිරීමට එකඟ විය. කෙසේ හෝ ඇය නිසල්ට කියා තිබුණේ රාත්‍රී කාලයේ ගෙදරට එන ලෙසය. ඒ සඳහා දෙදෙනාම ආරක්ෂිත ක්‍රම භාවිතා කර තිබුණි. නිසල්ගේ කාමරයෙන් සෘජුවම එළියට දොරක් තිබෙන අතර ඔහු රාත්‍රියේ කාටත් හොරා කාමරයෙන් පිටත්ව මෝටර් බයිසිකලය මීටර 100ක් පමණ තල්ලු කරගෙන ගොස් අර කාන්තාවගේ නිවසට යයි.

පසුව පැය 3ක් 4ක් අවශ්‍ය ලෙස නිදහසේ සිටින ඔවුහු පාන්දර ජාමේ වෙන්වෙති. සතියකට දෙවරක් පමණ මෙම කාර්යය සිදු කළ අතර ඊට ආයුෂ තිබුණේ මාස  2ක පමණ කාලයකි. දිනක් රාත්‍රියේ නිවසේ ඇසුණු ශබ්දයකට නිසල්ගේ දෙමව්පියන් ඔහුගේ කාමරයට ගොස් බලනවිට නිසල් කාමරයේ සිටියේ නැත. ඔහුගේ යතුරුපැදිය තිබුණේද නැත. පාන්දර ජාමේ යතුරුපැදිය තල්ලුකරගෙනම ඔහු ගෙදර එනවිට ඔහුව දෙමව්පියන්ට හසුවුණි. නිමක් නැති දෝෂාරෝපණවලින් දෙසවන් පුරවාගත් ඔහුගේ සංවරබවේ සායම ඔහුගේ දෙමව්පියන් ඉදිරියේ දියවී ගියේය.

පසුව පියා විසින් පසු දිනයේ ඔහුගේ කාමරය සෝදිසි කිරීමේදී එහි තිබී තවත් උපකරණ ආදිය සොයා ගන්නා ලදී. කෙසේ නමුත් නිසල් එම කාන්තාව ගැන වචනයක්වත් පිටකළේ නැත. එහෙත් අද වනවිට තම දෙමාපියන් තමා දෙස බලන ආකාරය පිළිබඳව ඔහු බොහෝසේ දුකට පත්වෙයි. නිසල්ව අහිමිවුණු එම කාන්තාව තවත් කොල්ලෙකු තම කාර්යයට යොදවා ගෙන ඇති බවට සැකයක් නැත.

අසම්මත ආශාවන් නිසා විනාශවෙන කොටස් 3ක් වෙයි. එනම් එම කාන්තාව සහ ඇයගේ පවුල ඇයගේ දරුවන්ගේ ජීවිත එම තරුණයාගේ ජීවිතය සහ ඔහුගේ දෙමව්පියන්ගේ අනාගත සිහිනයන්ය. නිසල් මෙන් මේ වනවිටත් එවැනි කාන්තාවන් සොයා යන තරුණයෝ වෙති. බසයේදී දුම්රියේදී හෝ සුපිරි වෙළඳසැලකදී සෙට්වෙන ඇන්ටිලා පස්සේ දුවන කොල්ලෝ කොළඹ ආශ්‍රිත ප්‍රදේශ තුළ ඕනෑ තරම් සිටිති. විශේෂයෙන් ඉතා ප්‍රසිද්ධ බැංකු වැනි විශිෂ්ට ආයතනවලට එන පාරිභෝගික  කතුන් එහි සිටින කඩවසම් තරුණයන්ව ඩැහැගනිති. රුපියල් ලක්ෂයක් පමණ වටිනා දුරකථන හා තෑගිබෝග ලබාදෙමින් කෙසේ හෝ තම නිදන කාමරයට හෝ ප්‍රසිද්ධ හෝලටයකට ගෙන්වා ගනිති.

මුහුණ පොත හරහාද මෙවැනි විවාහක කතුන් හමුවන අතර ඊටත් වඩා යනෙන මගතොටේ හමුවන ප්‍රමාණය වැඩිය. සංජනා යනු රත්මලානේ පදිංචි 28 වියැති විවාහක තරුණියකි. වසරක් වියැති දරුවෙකු සිටින ඇගේ සැමියා විදෙස් රටක සේවය කරයි. උදේ සිට සවස් වනතුරු ඇය දරුවා සමඟ තනිවම වාසය කරන අතර රාත්‍රියේදී ඇගේ දෙමව්පියෝ පැමිණ ඇගේ තනියට සිටිති. විවාහ වීමට පෙර සිටම සංජනා තම බාප්පාගේ පුතෙකු වන 23 වියැති කසුන් සමඟ සබඳතා පවත්වා ඇත.

නෑදැකමක් ප්‍රයෝජනයට ගෙන සංජනා තනිවම වෙසෙන කාලයේ කසුන් සමඟ නිදැල්ලේ සුවවිද ඇත. කෙසේ හෝ සංජනා මේ වනවිටත් කසුන්ව තම අනියම් සහකරුවෙකු ලෙස තබාගෙන සිටියි. කිසිම දිනෙක ඔවුන් දෙදෙනාව කාටවත් හසුවී නොමැති බවත් සියල්ලෝම ඔවුන්ගේ සමීප නැදෑකම නිසා විස්වාස කරනබවත් අපට පැවසුවේ කසුන්මය. ඔහු මෙම විස්තරයට අදාළ සාක්ෂි කිහිපයක්ද අපට පෙන්වූයේ ජංගම දුරකථනයෙනි. කසුන් සංජනා වැනි අසම්මත කතන්දර අන්තර්ජාලයේ ලිපි ලෙස කියවීමට ඇත. නමුත් එවැනි කථා ප්‍රායෝගික ලෝකයේ සිදුවෙන බවට කසුන් සනාථ කළේය.

මෙලෙසම අප විස්තර සොයාගත් ටානියා සීදුව ප්‍රදේශයේ වාසය කරන්නියක් විය. තම කුඩා දරුවාව පෙරපාසලට ඇතුළත් කරන ඇය එම පැය කිහිපය විටින්විට ගතකරන්නේ කඩවසම් ත්‍රීවිල් රියදුරෙකු වන කාවින්ද සමඟය. උගත්කමක් නැතත් කඩවසම් බව නිසා ටානියා කාවින්දට ආකර්ශනයවී ඇත්තේ තම බේබදු සැමියාගෙන් තමාට කිසි සන්තෘප්තියක් නොලැබෙන නිසාවෙනි. විටෙක ඔවුහු ත්‍රීවීලරය තුළ ජනශූන්‍ය ප්‍රදේශයට ගොස් පෙම්සුව විඳිති. විටෙක පැය 3කට කාමරයක් කුලියට ගෙන එහි ලැගුම් ගනිති. ඒ සියල්ලමත් කාවින්දගේ දවසේ පඩියටත් වියදම් කරන්නේ ටානියාය.

ප්‍රසිද්ධ ඇඟළුම් කර්මාන්තශාලාවක ඉහළ තනතුරක් දරන ඇගේ සැමියා රෑ බෝවන තුරු වැඩකොට බොහෝ විට ගෙදර එන්නේ බීමතිනි. බීමත් බව නිසා ඇයට හෝ දරුවාට කිසි කරදරයක් නොවුනත් ටානියාගේ මානසික සතුට ගැන තේරුම් ගැනීමට ඇයගේ සැමියාට පුලුවන්කමක් තිබුණේ නැත. එම නිසා කාවින්ද වැනි අයගෙන් එම සතුට සොයා ගැනීමට ටානියා පෙළඹී ඇත.

මෙවැනි පිරිස් මේ ලංකාවේ වාසය කරති. මෙවැනි ක්‍රියා නිසා ඝාතනය වුණු බිරින්දෑවරු සහ කොල්ලන් බොහෝමයකි. ටානියාසේම දෙහිවල භාග්‍යාද එලෙසම වූවාය. ඇයද පෙරපාසල් කාලය අතරතුර ඒ අසල ව්‍යාපාරිකයෙකු සමඟ හාද වී ඇත. මෙවැනි සබඳතාවල එකම අරමුණ ලිංගිකත්වය පමණකි. පවුලක අරුත නිවැරදිව වටහාගෙන පතිවත රැකගෙන ජීවත්වීමට තරම් ධෛර්යක්  නොමැති ටානියා භාග්‍යා සේම ශර්මිලා වැනි සුරූපී ගෘහණියන්සේම මව්වරුන්ද ලංකාවේ වාසය කරති.

අප තෝරාගත් සහ සොයාගත් මෙවැනි කාන්තාවන් පිරිසකගෙන් ලබාගත් දත්ත විශ්ලේෂණයකට බඳුන් කළෙමු. ඉන් 60%ක් පමණ කාන්තාවන් වයස අවුරුදු 28-38 අතර පසුවන්නියන් වූහ. ඔවුන් බොහෝමයක් කලක සිට පුරුද්දක් ලෙස මෙයට යොමු වී නොතිබුණු නමුත් විවාහයෙන් පසු මීට යොමු වී තිබුණි. 42ක ඔවුහු සැමියන් සිටින්නේ වෙනත් රටකය. ඔවුන්ගෙන් බොහෝමයකට වයස අවුරුදු 5ට වැඩි 10ට අඩු ළමුන් සිටියහ. දරුවන් පාසල් යන කාලය තුළ තම නිවසටම කොල්ලන් ගෙන්වාගෙන ජයටම පෙම්සුව විඳීම කරගෙන ගියහ. තවත් 28%කගේ සැමියන් හමුදා සේවයේ සහ සතියකට හෝ සති කිහිපයකට වරක් නිවසට පැමිණෙන අය වූහ.

මේ නිසා එම කාන්තාවන් කිහිපදෙනෙකු රාත්‍රී කාලයේ පවා මෙවැනි කොල්ලන් තම නිවෙස් තුළට ගෙන්වා ගෙන ඇත. සමස්තයක් ලෙස මොවුන් ඇසුරු කරන තරුණයන් 84%ක් වයස 25ට අඩු අවිවාහක අයවූ අතර ඔවුන් සාමාන්‍යයෙන් ටිකක් දුර ප්‍රදේශවල සිටින්නන් වූහ. තරුණයෝද බොහෝමයක් තමාගේ මුදල් අවශ්‍යතා සපුරා ගනු පිණිස මෙවැනි කාන්තාවන් ආශ්‍රය කරති. ඒ බව අපට පැවසුවේ විශ්වවිද්‍යාල සිසුන් කිහිප දෙනෙකි. සැමටම හොරෙන් තම උසස් අධ්‍යාපන කටයුතුවලට වැයවෙන මුදල් සොයා ගැනීමට මොවුහු මෙවැනි ඇන්ටිලා ආශ්‍රය කරති.

අන්තර්ජාලයේ යොමු කළ මෙවැනි ඇන්ටිලා සහ අක්කලා සොයන කොල්ලන් බොහෝමයකගේ දුරකථන අංක සොයාගත හැක. එසේම අතින් අත යන මෙවැනි කාන්තාවන් සමහරවිට මෙම කොල්ලන්ට හිසරදයක් වී ඇත. ගෘහණිය/ මව/ බිරිඳ දේවතාවක් ලෙස සලකන අපේ සමාජයේ ලෝකෙටම හොරෙන් මෙවැනි මල්ලිලා සමඟ යහන්ගතවෙන කාන්තාවන් දැන් පිළිලයක්සේ වර්ධනය වී ඇත. කොළඹ පමණක් නොව තරමක් දුෂ්කර ප්‍රදේශවලද මෙම ක්‍රමය අනුගත වී ඇත.

ස්වාමි පුරුෂයන් තම නිවස හා පවුල සොර සතුරුන්ගෙන් ආරක්ෂා කිරීමට කොතරම් නිවෙසෙන්  පිට කැමරා සවිකළත් නිවස ඇතුළේම වැරදි වැඩ කරන පිරිස අල්ලාගත නොහැක. ශර්මිලාද අවශ්‍ය පරිදි කැමරා විසන්ධි කොට අපගේ සගයා පිළිගත්තාසේ තවත් කොතරම් බිරින්දෑවරු මෙම ක්‍රියාවන් කරනවා ඇත්ද? සැමියා හා දරුවන් තම ජීවිතය ලෙස සලකන බිරින්දෑවරු බොහෝමයක් තවමත් අප රටේ සිටිති. ඔවුහු තම ආශාවන්ට වඩා පවුලේ පැවැත්මට මුල් තැනදී ක්‍රියාකරමින් සමාජයට ආදර්ශමත් ලෙස සිටිති.

මෙහි තවත් පැතිකඩක් තිබේ. එනම් සම්බාහන ආයතනවල සේවය කරන විවාහක කතුන්ය. කොළඹ පොඩි රස්සාවක් කරනවා යැයි සැමියාට කියා සම්බාහන ආයතනවල පිරිමින් සමග ගතකොට රු. 2000/- සිට රු. 5000/- තෙක් හම්බකරන බිරින්දෑවරු සහ අම්මාවරු බොහෝමයක් දෙහිවල, බම්බලපිටිය සිට මරදාන හා නුගේගොඩ සමස්ත ප්‍රදේශපුරා තිබෙන මසාජ් ආයතනවල සේවය කරති. තමාගේ බිරිඳ ඇත්තටම වැඩ කරන ස්ථානය දැක තිබෙන සහ ඒ තුළට ගොස් තිබෙන සැමියන්ගේ බිරින්දෑවරු මෙහි නොමැත.

එසේ නම්  බිරිඳගේ රැකියා ස්ථානය පිළිබඳව වඩාත්ම විමසිලිමත් විය යුතුය. මන්ද වසංගතයක්සේ මෙම රැල්ල කොළඹ පුරා තිබෙන සම්බාහන ආයතනවල පැතිර තිබෙන නිසාය. කොල්ලන් සොයා යන අම්මලාට තම ජීවිතයේ වැරැද්ද තේරෙන්නේ සැමියාට මෙම හොර වැඩ අසුවූ පසුවය. එවිට ඇයට ඉතිරි වෙන්නේ ගණිකාවකගේ ස්ථානය පමණකි. එම නිසා මීට වඩා යහපත් ලෙස පතිවත රැකගැනීමේ වැදගත්කම බිරිඳ හා සැමියා තේරුම් ගතයුතුය.

(නම් ගම් මනඃකල්පිතය) සටහන :ශමින්ද රන්ශාන් ප්‍රනාන්දු
ලිපි මුලාශ්‍රය – ලංකාදීප පුවත්පත

Source Link : Wishma Lokaya

නොනාලගේ සතුට ගැන මහත්තුරු දන්නේ නැති දේවල්

වර්තමාන ලෝකේ වැඩි වුන ආර්ථික නිදහස නිසා ගැහැණු දැන් ශක්තිමත්. සැමියා ඇයගේ මානසික කායික අවශ්‍යතා සපුරන්නේ නැත්නම් විවාහය අතහැර යන්න උනත් ඇය සූදානම්.කවුරුනමුත් ඉක්මන් තීරණ ගැනීම නම් හොඳ දෙයක් නොවෙයි. ඒත් මෙන්න මේ හැසිරීම් ඔබ පුහුණු කළොත් කවදාවත් ඔබේ බිරිඳට ඔබ ගැන අකමැත්තක් දැනෙන එකක් නැහැ. තමන්ගේ ගැහැණිය ආකර්ෂණය කරගන්න හිතන  ඕනැම පිරිමියෙකුට මේ ලිපිය වැදගත් වේවි.

ඇයගේ අදහස් විමසන්න

පවුල වෙනුවෙන් ඔබ තනිවම මුදල් උපයනවා වෙන්න පුළුවන්. නමුත් හැම කටයුත්තකදීම බිරිඳගේ අදහස් විමසීම ගොඩක් වටිනවා. පොඩි දේවල් පවා දෙදෙනාගේ කැමැත්තෙන්ම කරන්න. සමහර විට ඔබ චිත‍්‍රපටයක් බලනවා නම්, නැත්නම් විනෝද ගමනක් යනවා නම් ඇය සතුටු දෙය තෝරා ගන්න මැලි වෙන්න එපා. ඇය වෙනුවෙන් පොඩි දෙයක් කැපකළාම මොකද වෙන්නෙ!

දෑත් පටලා ගමන් යන්න

ඒ හැසිරීමෙන් පෙනෙන්නේ ඔබ ඇය පිළිබඳව ආඩම්බර වෙන බවයි. අනික් අය ඉදිරියේ ඇගේ ආත්ම විශ්වාසය වැඩි වෙන්න ලොකු රුකුලක් වෙනවා. බොහෝ ස්වාමිවරු පහු වෙද්දී ගමන් යන්නේ කාන්තාවට වඩා ගොඩක් ඉස්සරහින්. හරියට තරගයක් වගේ. නැහැ . හෙමින් යන්න. මොකටද හදිස්සි. ජීවිතේ කියන්නේ එක්කෙනෙක් අනිවාර්යයෙන්ම ඉස්සෙල්ල වෙන් වෙන ගමනක් තමයි. ඔබට අතහැරලා ඉන්න බොහෝ කාලයක් ලැබේවි. ඒත් අත් පටලාගෙන ඉන්න ලැබෙන්නේ බොහෝවිට කෙටි කාලයක් විතරයි. ඒ ගැන මෙනෙහි කරන්න.

බැන්දට පස්සෙත් දුරකථනය වැඩ

රාජකාරී දිනවල ඔබ සිටින්නේ දෙතැනක නම් දවල් කාලා කෝල් එකක් දෙන්න. පොඩි එස්.එම්.එස් එකක් යවන්න. ඒවා තියෙන්නේ ආදරය කරන කාලෙදී පාවිච්චි කරන්න විතරක් නොවෙයි. විවාහ වුණාට පස්සෙත් බිරිඳගේ දුරකථනය වැඩ බව බොහෝ ස්වාමිවරු අමතක කරනවා.

එක වහල යටදී තරහ අමතක කරන්න

මේ ලෝකේ කිසිම මනුස්සයෙක් සර්ව සම්පූර්ණ නැහැ. ඇය වගේම ඔබත්. ඔබේ බොහෝ වැරදි ඇති බිරිඳ ගණන් නොගෙන සිටින. ඇය අතින් ඔබේ යමකට හානි වුණොත්, බත් එක දෙන්න අවදිවෙන්න බැරි උනොත්, ගෙදර භාණ්ඩ බිඳුනොත්, ඔබට ඇය නිසා මුදලින් පොඩි පාඩුවක් උනොත් ඒක දුර ගෙනියන්න එපා. ඒ පොඩි දෙය මගහැරුනට ඇය කරන කටයුතු ගොන්න ගැන අවංකව හිතල බලන්න. ඔබේ හිත ඉබේ මෘදු වේවි.

මොනවහරි උදවුවක්  ඕනෙද?

ඔබ බිරිඳ වැඩ කරද්දී නොදැක්කා වගේ ඉන්නෙ නැතුව ඇයට උදවුවක් අවශ්‍යද කියල දැන ගන්න. ඔබ ඇගේ සැමියා. සතුට වගේම දුකත් බෙදා හදා ගන්න තැනැත්තා.සැමියා බිරිඳගේ මහන්සිය කෙරෙහි සංවේදී වීම අනිවාර්යයි. සමහරවිට උදවුවක් නොකර හරි ඇය දවසම වෙහෙසිලා රාත‍්‍රී ආහාර පිසිද්දී නිකන් කුස්සියට වෙලා කයියක් ගහනවා නම් ඇයට දවසේ වෙහෙස නැති වෙලා ඔබ කෙරෙහි ආදරය වැඩි වේවි.

දරුවන් ඉදිරියේ හාදු එපාද?

ඇත්තටම ගොඩක් අය දෙමාපියෝ උනාම තමන්ගේ ආදරේ අමතක කරනවා. තමන්ගේ දරුවෝ ඉදිරියේ අම්මව සිප ගැනීම නුසුදුසු දෙයක් වගේ සලකනවා. එය සම්පූර්ණයෙන්ම වැරදියි. තමන්ගේ දෙමාපියන් ආදරෙන් සිටින බව දරුවන් දැකිය යුතුයි. ආදර”ය දරුවන් බවට ඔවුන් පත් වෙන්නෙ එතකොටයි. ආදරය කරන හැටි දරුවන්ට ආදර්ශයෙන් පෙන්වන්න.  හැම විටම නිවසට එද්දී ඇයට ආදරයට හාදුවක් දුන්නොත් එයින් අයට දැනෙන්නේ ඔබ ඇයව දැකීමට පුල පුලා බලාගෙන සිටි බවයි.

කෙනෙකුට ඇය හඳුන්වා දෙද්දී අගය කිරීමක් එක්කම කරන්න

මේ තමයි මගේ ආදර නෝනා මහත්තයා, කියල ඔබේ යහළුවන්ට, ඥාතීන්ට ඇයව හඳුන්වා දෙන්න පුළුවන් නේද? මෙහෙම කළ යුත්තේ අවංකවමයි. හැම විටම අනුන් ඉදිරියේදී ඇය පිළිබඳව ආඩම්බරෙන් , අගය කරලා කතා කරද්දී ඇයට ඉබේම ස්වයන් තෘප්තියක් ලැබෙනවා. නිකන් තිබෙන කටින් වචනයක් පිට කිරීම අමාරු නැහැ. තත්පර කීපයයි යන්නේ. උවමනා ඇය කෙරෙහි පේ‍්‍රමයක් ඇති කර ගැනීම පමණයි. ඒ සුළු දෙයින් රත්රන් මාලයකට වඩා ඇය සතුටට පත් වේවි. ඒ සතුට නැවත ගලා එන්නෙත් ඔබේ ජීවිතේටමයි.

සඳමාලි වර්ණසූරිය – උපුටා ගැනීම – රිවිර පුවත් පත

Source Link : Wishma Lokaya

ඔබ රාත්‍රියට නිදා ගන්න ඉරියව්ව අනුව ඔබේ චරිත ලක්ෂණ කියවෙනවා – බලන්න මේ දේවල් ඇත්තද කියලා

බොහෝ වෙලාවට අපේ ශරීරයේ විශේෂ ලක්ෂණ වගේම අපේ විශේෂ හැසිරීම් වලට අනුවත් අපේ ගතිගුණ ගැන කියවෙනවා. බහුතරයක් දෙනා මේ දේවල් ගැන දැනගන්නත් වැඩි උනන්දුවක් දක්වනවා. අද අපි ඔබට කියන්න යන්නේ ඔබ නිදාගන්න ඉරියවුව අනුව කියවෙන ඔබේ ගතිගුණ ගැනයි

1. ඔබ පැත්තකට හැරී දණහිස් දෙක මදක් නවාගෙන නිදාගන්න අයෙක් නම්

ඔබ බොහොම නිවුණු ගතිගුණ ඇති සහ විස්වාස කල හැකි පුද්ගලයෙක්. කිසිවෙකුට පහසුවෙන් බැහැ ඔබට කරදරයක් කරන්න. ඔබ තුළ අනාගතය පිළිබදව කිසිම ආකාරයක දුකක් නැහැ. ඒ වගේම ඔබ නිතරම බොහොම සිනහ මුසුව සිටින අයෙක්. ඔබට පුළුවන් ඕනෑම ප්‍රශ්නයක් බොහොම පහසුවෙන් විසදගන්න, ඔබේ ජිවිතයට කිසිම බලපෑමක් නොවන ලෙස.

2. ඔබ වකුටුවී නිදාගන්න අයෙක් නම්

ඔබට නිතරම දැනෙන්නේ ඔබට ආරක්ෂාවක් ලැබිය යුතු බවයි. ඒ වගේම ඔබ අනෙක් අයගෙන් අවධානය, ඔබව තේරුම් ගැනීම වගේම අනුකම්පාවත් බලාපොරොත්තු වෙනවා. ඔබ ජිවිතයේ ප්‍රශ්න වලට මුහුණ දෙන්න බයයි. නිතරම බලන්නේ ප්‍රශ්න ඇතිවෙන අවස්ථාවන් මගහැර සිටින්න. නමුත් ඔබ තුළ විශේෂ හැකියාවක් තියනවා චිත්‍ර අදින්න, නර්තනයේ යෙදෙන්න වගේම නිර්මාණාත්මකව යම් යම් දේවල් ලියන්න කියන්න.

3. ඔබ අත් සහ කකුල් සැහැල්ලුවෙන් තබාගෙන මුනින් අතට හැරී නිදාගන්නවා නම්

ඔබ නායකත්ව ලක්ෂණ වලින් පරිපූර්ණ අයෙක්. ඔබ යමක් ක්‍රියාවට නංවන්න ඉක්මනින් කටයුතු කරනවා වගේම එය හොදින් ඉටු කිරීමේ හැකියාවත් ඔබට තිබෙනවා. ඔබ පෞද්ගලික ජීවිතයේදී වගේම වෘතීය ජීවිතයේදීත් බොහොම පිළිවෙලකට කටයුතු කරන අයෙක්. ඔබ හැම දෙයක්ම හොදින් සැලසුම් කරනවා වගේම ඒ පිළිබදව වගකීමකින් කටයුතු කර සාර්ථකව එම කටයුතු අවසන් කරනවා.

4. ඔබ අත් සහ පාද සැහැල්ලුවෙන් තබාගෙන උඩුබැලි අතට නිදාගන්නවා නම්

ඔබ ජිවිතයට ආදරය කරන ඒ වගේම ජීවිතය ගැන ධනාත්මකව හිතන පුද්ගලයෙක්. ඒ වගේම ඔබ බොහෝ දෙනෙක්ගේ අවධානයට සහ ආදරයට ලක්වෙන කෙනෙක්. ඔබ වර්තමානයේදී හිතුවක්කාර ලෙස කටයුතු කලත් ඔබ වැඩ කරන්නේ බොහොම කල්පනාකාරී ලෙස. ඔබ කැමති නිතරම ඇත්ත කතාකරන්න. ඒ වගේම ඔබට තිබෙන්නේ හොද පෞර්ෂයක්.

5. ඔබ අත් සහ පාද සීරුවෙන් තබාගෙන උඩුබැලි අතට නිදාගන්නවා නම්

ඔබ ජිවිතයේ බොහෝ දේවල් හොදින් කළමනාකරණය කරගන්නා අයෙක්. ඔබ ඔබේ ජිවිතයේ අරමුණු හොදින් හදුනාගෙන ඒවා සාර්ථක කරගැනීම සදහා එක සිතින්ම ක්‍රියා කරන අයෙක්. සමහර විට ඔබ තද ගතිගුණ තිබෙන, ටිකක් පණ්ඩිත, තමන් ගැන ආඩම්බර වන අයෙක් විය හැකියි.

6. ඔබ පැත්තකට හැරී එක් කකුලක් පමණක් නවාගෙන නිදාගන්න අයෙක් නම්

ඔබ සතුව ඇත්තේ වෙනස්වන සුළු පෞර්ෂ ලක්ෂණ. ඔබ අවස්ථානුකුලව ඔබේ ප්‍රතිචාර වෙනස් ලෙස දක්වනවා. ඔබේ මානසික තත්වය බොහොම ඉක්මනින් වෙනස් වෙනවා. මේ නිසාම ඔබ වටේ සිටින අය අපහසුතාවයට පත්වෙනවා. ඔබට යමක් තෝරාගැනීමට සහ තීරණය කිරීමට වැඩි කාලයක් ගතවෙනවා.

Source Link : Wishma Lokaya

කැමරාවෙන් දුටු දෙයින් සැමියා පුදුමයට පත් උනා – ඔබේ බිරිදත් මේ වැඩේ කරනවද බලන්න

පවුලේ බර වැඩිපුර දරන්නේ ගැහැණියද පිරිමියාද යනුවෙන් කෙනෙකු පැනයක් නැගුවොත් බොහෝ දෙනෙක් එයට පිළිතුරු ලෙස පිරිමියා යනුවෙන් පවසාවි. පිරිමින් බොහෝ විට බර ඉසිලීම් , මහන්සි වීම් , රෑ වනතුරු වැඩ කිරීම් ආදී දේ කරන නිසා මෙම තත්වය ගොඩ නැගී තිබෙනවා. නමුත් මෙය සැබෑවක්ද ? ඇත්තෙන්ම මේ පිළිබදව අද සමාජයේ බොහෝ දෙනකුට තියෙන්නේ ප්‍රශ්නයක්. මන්ද පිරිමියා සේම ගැහැණියටද නිවසේ බොහෝ වැඩ රාජකාරි මහන්සියෙන් කිරීමට සිදු වීමයි. මේ පිළිබද නිවැරදි අවබෝධයක් ලබා දෙන අපුරු වීඩියෝවක් ජපාන මාධ්‍ය මගින් අන්තර්ජාලයට මුදා හැර තිබෙනවා.

මෙම වීඩියෝවේ  දැක්වෙන්නේ ජපානයේ ටෝකියෝ නුවර ජිවත් වන තරුණ මවක් තම දවස ගත කරන ආකාරය පිළිබදව ඇයගේ සැමියා විසින් හොර රහසේ පටිගත කරන ලද රූප පෙළකි. මෙය නරඹා අවසාන වන විට පවුලක බර වැඩිපුර උසුලන්නේ ගැහැණියද පිරිමියාද යන්න පිළිබදව ඔබට මැනවින් වැටහේවි යැයි අපි සිතනවා.

Source Link : Wishma Lokaya

ගැබිණි මවකට හදලා තෑගි කරන්න රසවත් පෝෂ්‍යදායි දිවා ආහාර විශේෂ වට්‌ටෝරුවක්

ගැබිණි මවක් කියන්නේ සමාජයේ සුවිශේෂී චරිතයක්. ගැබිණි කාන්තාවකට සමාජය තුල දන්නා නොදන්නා සෑම කෙනෙක්ගෙන්ම ලැබෙන්නේ විශේෂ ආදරයක් සැලකිල්ලක්. ඉතින් එවැනි කාන්තාවකට එක් දිනකදී හෝ ආදරණිය තෑග්ගක් දෙන්න පුළුවන් නම් කොච්චර දෙයක්ද නේද ? ඔන්න එහෙනම් අද විශ්ම ලෝකයෙන් ඔයාලට කියලා දෙනවා ගැබිණි කාන්තාවකට රසවත් වගේම පෝෂණීය දිවා ආහාර වේලක් සකස් කර දෙන විදිය. ගැබිණි කාන්තාවන්ට වගේම දියවැඩියා රෝගින්ටද මෙම දිවා ආහාර වේල පිළිගන්වන්න සුදුසුයි.

රතු කැකුළු බත්

අවශ්‍ය ද්‍රව්‍ය

රතු කැකුළු කිලෝ 1 (හොඳින් සෝදා ගල් වැලි ඉවත් කරගන්න)
වතුර
ලුණු මේස හැඳි 1

සාදන ක්‍රමය

සෝදාගත් සහල් මුට්‌ටියකට දමා අවශ්‍ය තරමට වතුර එකතු කර ලුණු මිශ්‍ර කර විනාඩි 20 ක්‌ පමණ හොඳින් තැම්බුණ පසු කූරු ගා මදගින්නේ විනාඩි තුනක්‌ පමණ පිසගන්න. ඉන්පසු ඇතුල්පතකට දමා සුළු වේලාවක්‌ නිවෙන්න හැර හොඳින් කැට කඩා බත් දීසියකට දමාගන්න.

පොලොස්‌ වෑංජනය (කළුවට)

අවශ්‍ය ද්‍රව්‍ය

සුද්ධ කර කැබලි කරගත් තරමක පොලොස්‌ ගෙඩි 1
සිහින්ව කපා ගත් රතු ළූනු ග්‍රෑම් 25
සිහින්ව කපා ගත් සුදු ළූනු ග්‍රෑම් 20
සිහින්ව කපා ගත් අමු මිරිස්‌ කරල් 3
කැබලි කපා ගත් තක්‌කාලි ග්‍රෑම් 25
මිටිකිරි කෝප්ප 4
දියකිරි කෝප්ප 2
බැදපු පහේ කුඩු මේස හැඳි 2
කහ කුඩු තේ හැඳි 1/4
මිරිස්‌ කුඩු තේ හැඳි 1
ලුණු තේ හැඳි 2
පොල් තෙල් තේ හැඳි 4
කුරුඳු ස්‌වල්පයක්‌
රම්පේ, කරපිංචා
අමු ඉඟුරු ස්‌වල්පයක්‌

සාදන ක්‍රමය

භාජනයකට තෙල් දමා ලිපේ තබන්න. තෙල් රත් වූ පසු ළූනු, සුදු ළූනු, රම්පේ, කරපිංචා රන්වන් පාට වන සේ බැදගන්න.
එයට පොලොස්‌ එකතු කරන්න.

මිටි කිරි හැර ඉතිරි කුළු බඩු සහ ලුණු දමා හොඳින් කලවම් කර දිය කිරෙන් තම්බා ගන්න. පොලොස්‌ හොඳින් තැම්බුනු පසු මිටි කිරි දමා උකුවන තුරු පිසගන්න.

ඇඹුල් තියල්

අවශ්‍ය ද්‍රව්‍ය

කෙලවල්ලා මාළු කිලෝ 1( පිරිසිදු කර අඟල් 11/2කැබලි කපන්න)
තම්බා අඹරාගත් ගොරකා ග්‍රෑම් 100
සිහින්ව කපා ගත් අමු මිරිස්‌ කරල් 5
සිහින්ව කපා ගත් සුදු ළූනු බික්‌ 3
සිහින්ව කපා ගත් රතු ළූනු ගෙඩි 5
ගම්මිරිස්‌ කුඩු මේස හැඳි 1 1/2
ඉඟුරු තේ හැඳි 1
ලුණු තේ හැඳි 1
කුරුඳු ස්‌වල්පයක්‌
කරපිංචා ස්‌වල්පයක්‌

සාදන ක්‍රමය

ගොරකා, සුදු ළූනු, ළූනු, අමු මිරිස්‌ සහ අනෙකුත් ද්‍රව්‍ය සියල්ල එකට අඹරාගන්න. භාජනයක්‌ ගෙන වතුර දමා අඹරාගත් සියළු දේ සමඟ මාළු සහ ලුණු එකතු කර විනාඩි 25ක්‌ මද ගින්දරේ භාජනය වසා තම්බාගන්න. ලිපෙන් බා දීසියකට දමා පිළිගන්වන්න.

රාබු කොළ මැල්ලුම

අවශ්‍ය ද්‍රව්‍ය

සිහින්ව කපාගත් රාබු කොළ ග්‍රෑම් 300
සිහින්ව කපා ගත් රතු ළූනු ගෙඩි 5
සිහින්ව කපා ගත් අමු මිරිස්‌ කරල් 5
ගා ගත් පොල් කෝප්ප 1
කහ කුඩු තේ හැඳි 1/4
ලුණු තේ හැඳි 1/2
අබ තේ හැඳි 1/2
කරපිංචා
දෙහි යුෂ

සාදන ක්‍රමය

රාබු කොළ හැර අනෙකුත් සියළු දේ අඹරාගන්න. භාජනයක්‌ ගෙන රාබු කොළ සහ අඹරාගත් කුළු බඩු මිශ්‍ර කර මද ගින්නේ සුළු වේලාවක්‌ පිස ගන්න. ලිපෙන් බා දෙහි යුෂ මිශ්‍ර කරන්න

වියළි හාල්මැස්‌සන් තෙල් දැමීම

අවශ්‍ය ද්‍රව්‍ය

පිරිසිදු කරගත් හාල්මැස්‌සන් ග්‍රෑම් 250
සිහින්ව කපා ගත් සුදු ළූනු බික්‌ 4
සිහින්ව කපා ගත් ලොකු ළූනු ග්‍රෑම් 250
මිරිස්‌ කුඩු තේ හැඳි 1
කැබලි මිරිස්‌ තේ හැඳි 2
පොල්තෙල් මේස හැඳි 4
ලුණු තේ හැඳි 1
රම්පේ, කරපිංචා
දෙහි යුෂ ස්‌වල්පයක්‌

සාදන ක්‍රමය

භාජනයක්‌ තෙල් දමා ලිපේ තබන්න. තෙල් රත් වූ පසු ලොකු ළූනු, සුදු ළූනු, රම්පේ, කරපිංචා දමා සුළු වේලාවක්‌ තෙම්පරාදු කරගන්න. එයට හාල්මැස්‌සන් දමා යළිත් හොඳට කලවම් කරන්න.

කැබලි මිරිස්‌, මිරිස්‌ කුඩු සහ ලුණු එකතු කර කලවම් කරන්න.

සුළු වේලාවකට පසු ලිපෙන් බා එයට දෙහි යුෂ මිශ්‍ර කර ආහාරයට ගන්න.

පොල් සම්බෝලය

අවශ්‍ය ද්‍රව්‍ය

සිහින්ව ගා ගත් පොල්ගෙඩි 1
සිහින්ව කපා ගත් රතු ළූනු ග්‍රෑම් 20
අමු මිරිස්‌ කරල් 3
ගම්මිරිස්‌ කුඩු තේ හැඳි 1
කැබලි මිරිස්‌ මේස හැඳි 1
මිරිස්‌ කුඩු තේ හැඳි 1/2
තරමක තක්‌කාලි ගෙඩි 1
ලුණු තේ හැඳි 1 1/2
දෙහි යුෂ ස්‌වල්පයක්‌
උම්බලකඩ ස්‌වල්පයක්‌

සාදන ක්‍රමය

භාජනයක්‌ ගෙන එයට පොල් සහ සියළු කුළු බඩු එකතු කරන්න. හොඳින් කලවම් කර අවසානයට දෙහි දමා යළිත් කලවම් කර ආහාරයට ගන්න.

(මෙය වංගෙඩියක කොටා හෝ ගලේ අඹරා වුවද පිළියෙල කරගත හැකිය)

ලිපි මුලාශ්‍රය – නවලිය පුවත්පත

Source Link : Wishma Lokaya

ඔබට ඊර්ෂ්‍යා කරන මිතුරන් හදුනා ගත හැකි ලක්ෂණ 8ක්

මේ අප්‍රසන්න හැගීම ඕනෑම කෙනෙක්ට ජීවිතයේ එක් වරක් හෝ දැනිලා තියෙන දෙයක්. එය පාලනය කරන්න අපහසු වුවත්, අපේ හැගීම් පාලනය කළ යුතු වන්නේ අපිමයි. එනම්, අපිට වෙනත් පුද්ගලයෙකුගේ මනස තුලට ඇතුළු වී, ඔහුගේ/ඇයගේ අප ගැන ඇති හැගීම සොයා ගත නොහැකියි. ඒ නිසා මෙම ලිපියෙන් විස්තර වන්නේ කෙනෙක් අප සමග ඊර්ෂ්‍යාවෙන් පසු වනවා නම් ඒ බව හඳුනා ගත හැකි ලක්ෂණ 8ක් පිළිබඳවයි. ඒ වගේම ඔබට එය අවම කළ හැකි ක්‍රම කිහිපයක්ද විස්තර කර තිබෙනවා.

1. බොරු ප්‍රශංසාව

ඔබ සමග ඊර්ෂ්‍යාවෙන් පෙලෙන කෙනෙක්ට, ඔබව බොහොම සුහදව වර්ණනා කිරීම ගැටලුවක් නොවෙන්න පුළුවන්. නමුත් ඔබ ඔවුන්ගේ දර්ශනයෙන් ඉවත් වූ විට එය එසේ නොවෙයි. හේතුව, ඔවුන් බොහෝ වෙලාවට ඊර්ෂ්‍යා නැති බවට බොරුවට අගවනවා. ඔබ කල යුත්තේ ඔවුන් ජීවිතයේ යමක් ළඟාකරගත්විට, ඔවුන්ට හදවතින්ම සුභ පැතීමයි. එවිට ඔබේ හෘදයාංගම බව දැකීම, ඔවුන්ගේ ඊර්ෂ්‍යාව මැඩලීමට උපකාර වනවා.

වරක් මනෝ වෛද්‍යවරයෙක් පවසා තිබෙනවා අනෙක් අයගේ වර්ණනා හෝ පුරාජේරු හමුවේ, ඔබව අනවශ්‍ය ලෙස පැසසීමට සැඟවුණු හේතුවක් තිබේද යන්න සිතා බැලීම දුරදර්ශී ක්‍රියාවක් බව. එලෙස විශ්වාසවන්තව පෙනෙන ප්‍රශන්සා සැබෑවටම එලෙස නොවන බව ක්‍රමයෙන් ඔබට හඳුනා ගත හැකියි.

2. ඔබේ සාර්ථකත්වය පහළ හෙලීම

ඔබ කොතරම් ඉහල සාර්ථකත්වයක් ලැබුවත්, ඔබට ඊර්ෂ්‍යා කරන්නන් එය එතරම් වටිනා දෙයක් නොවන බව කියා පෑමට උත්සහ කරනවා. ඔවුන්ගේ හේතු නපුරු සහ පහත් ඒවා වනවා. වරක් විද්‍යාධරයෙක් පවසන්නේ, ඔබට ඊර්ෂ්‍යා කරන්නේ, ඔබ සතු දේවල් ඔවුන්ගේ කර ගැනීමට බලවත් ආශාවක් ඇති අය බවයි.

ඔවුන්ගේ උගුලට හසු වීමෙන්, ඔබ එම ක්‍රියාවන් සඳහා ඔවුන්ට ඉදිරියේදීත් අවස්ථාව ලබා දෙනවා. එම නිසා, ඔබ ඔබේ සාර්ථකත්වයන් ගැන නිහතමානීව එහෙත් ස්ථාවරව සිටීම වඩා සුදුසු වෙනවා. නැතහොත් ඔවුන් තවත් ඊර්ෂ්‍යා සහගත බව වැඩි කරගන්නවා.

3. ඔවුන්ගේ සාර්ථකත්වය පිලිබඳ පුරසාරම් කියවනවා.

ඔවුන් තමන්ගේ සාර්ථකත්වය අනවශ්‍ය ලෙස ඉහලින් දක්වනවා. මෙය බොහෝ විට සිදු කරන්නේ ඔබ ඔබේ සාර්ථකත්වය සමරන විටයි. එයට හේතුව, ඔබ ඔවුන්ට වඩා සාර්ථක බව හැඟෙන නිසයි.

බොබ් බ්ලයි නමැති රචකයා පවසන්නේ, බොහෝ විට තමන්ගේ අරමුණු ඉටු කර ගත නොහැකි වීමෙන්, ඔවුන් ගැන පමණක් නොව අන් අය ගැනද සෘණාත්මක ආකල්ප වලින් පිරුණු පුද්ගලයන් සමාජයේ දක්නට ඇති බවයි.

මෙවැනි අය ඉදිරියේ ඉච්චාබංගතත්වයට පත් වීම සාමාන්‍යයි, නමුත් එය පෙන්වීමෙන් ඔවුන්ගේ හැසිරීමට අනුබලයක් වෙන නිසා ඔවුන්ගේ එම හැසිරීම තවත් පහසු කරනවා. ගින්දර සමග සටන් කල යුත්තේ ගින්දර යොදා ගෙනමයි. එම නිසා ඔවුන්ගේ සාර්ථකත්වයන් අවංකවම අගය කරන්න. එවිට ඔබ ඔවුනට ආදර්ශයක්ද වනවා.

4. ඔවුන් ඔබව අනුකරණය කරනවා

ඔබ සමග ඊර්ෂ්‍යාවෙන් පෙලෙන පුද්ගලයන්, ඔබ වගේම හෝ ඔබට වඩා ඉහලින් සිටීමට තදබල කැමැත්තක් දක්වනවා. එම නිසා ඔබ ඇවිදින, කතා කරන හෝ අඳින පළඳින ආකාරය අනුකරණයට නිතැතින්ම පෙළඹෙනවා. නමුත් මෙය පිළබඳව කණගාටු නොවන්න. ඒවෙනුවට, ඔවුනට ආවේනික පෞර්ෂ්‍යයක් ගොඩ නගා ගැනීමට උපකාර කරන්න. අනුකරණයෙන් තොරව යමක් කරන විට ධෛර්යමත් කරන්න.

5. ඔබ සමග තරඟකාරීව ක්‍රියා කරනවා

එක්තරා මනෝ වෛද්‍යවරයෙක් පවසන අකාරයට ඊර්ෂ්‍යා සහගත පුද්ගලයින් තමන් පිලිබඳ අවිනිශ්චිත හෝ අහංකාර වන අතර ඔවුන්ට තමන් අන්‍යයන්ට වඩා ඉහලින් සිටින බව පෙන්වීමට අවශ්‍ය බවත් ය. එම නිසා ඔවුන් තරගකාරී වනවා. ඔබ එවැනි අවස්ථාවකට පත් වුවහොත් හැකි තරම් එය මග හැරීමට උත්සාහ ගන්න. මෙවැනි ප්‍රතික්ෂේප කිරීම් හමුවේ, ඔවුන් එලෙස උත්සාහ කිරීම නවතා දමනවා.

6. ඔබේ පරාජයන් සමරනවා

ඔබට ඊර්ෂ්‍යා කරන පුද්ගලයන් ඔබේ වැරදි අඩුපාඩු දකින විට සතුටු වනවා. පිටතට නොපෙන්නුවත් ඔවුන් එය සතුටින් සමරනවා. වැරදි අඩුපාඩු සිදු වන විට බිය නොවී හිස කෙලින් තබා ගෙන වැඩ කරන්න. ඒ වගේම ඒවා ජීවිතයේ කොටසක් බව මතක තබා ගන්න. ඔබ එලෙස නොසලෙන විට, ඔවුන්ට අවශ්‍ය සතුට ලැබෙන්නේ නැත.

7. ඔවුන් ඔබ ගැන කටකතා පවසනවා

මෙලෙස පවසන දේවල් ඇත්තටම වේදනාකාරී වෙන්න පුලුවන්. මේ පිලිබඳ ඔවුන් සමග සෘජුව කතා කිරීම, එවැනි දේවල් සමග ගනුදෙනු කිරීමට සුදුසුම ක්‍රමයයි. ජේම්ස් ක්ලියර් නම් කතුවරයෙක් පවසන ආකාරයට,  අනෙක් පුද්ගලයන්ගේ සෘණාත්මක බව බිත්තියක් වැනිය. ඔබ ඒ පිලිබඳ අවධානය යොමු කළොත්, ඔබ ඒ වෙත යැවෙනවා. ඔබත් ඒ සෘණාත්මක අදහස්, තරහව සහ ආත්ම විශ්වාසය නොමැති බව ආදියෙන් අවහිර වනවා. ඔබ අවධානය යොමු කරන දිශාවටයි ඔබේ මනස ගමන් කරන්නේ.

විවේචනය සහ සෘණාත්මක බව ඔබේ ඉලක්කයට යාම වළක්වන්නේ නැතත්, ඔබව පසු පසට අදිනවා. ඊර්ෂ්‍යා සහගත පුද්ගලයන් කිසිවක් මුහුනට නොපවසන බැවින්, ඔබ ඔවුන් සමග සෘජුව ඔවුන්ගේ හැසිරීම පිලිබඳ කතා කළොත්, ඔවුන් ඒ පිළිබඳව දෙවරක් සිතීමට වගේම කටකතා පැතිරවීම සම්පුර්ණයෙන්ම නවත්වා දැමීමට ඉඩ තිබෙනවා.

8. ඔවුන් ඔබට වෛර කරනවා

යම් කෙනෙක් හේතුවකින් තොරව ඔබට වෛර කරනවා නම් ඒ ඔවුන් ඔබට ඊර්ෂ්‍යා කරන නිසායි. කිසිවෙක් තවත් කෙනෙක් තමන්ට වෛර කරනවාට කැමති නැහැ, එම නිසා මෙයට මුහුණදීම අපහසුයි. ඔබට එම පුද්ගලයාට ප්‍රසන්න ලෙස සිටීමට හිතෙන්න පුළුවන්. නමුත් එසේ කිරීමට නොහැකි නම් ඔබේ ජීවිතයෙන් එම පුද්ගලයාව ඉවත් කිරීම වඩා සුදුසුයි. එයින් ඔබට අනවශ්‍ය සෘණාත්මක දෙයින් මිදෙන්න අවස්ථාව ලැබෙනවා.

අවසාන වශයෙන් ප්‍රකාශ කරනවා නම්, ඔබට ඊර්ෂ්‍යා කරන කෙනෙක් සමග ගනුදෙණු කිරීම අපහසු කටයුත්තක්. නමුත් ඔබට එයට ධනාත්මකව සහ අභියෝග නොකර මුහුණදීමට හැකි නම්, ඔබ සාර්ථක වීමට වැඩි ඉඩකඩක් තිබෙනවා. මෙවැනි ඊර්ෂ්‍යා සහගත පුද්ගලයන් තුල ආත්ම අභිමානය සම්බන්ධ නිරාකරනය කර ගත නොහැකි ගැටළු පවතිනවා. නමුත් ඔබ කෙතරම් උත්සහ කළත්, එම පුද්ගලයන් වෙනස් වන්නේ නැති නම්, ඔබ ධනාත්මකව සිටින්න. අන් අයට ඔවුන්ගේ සෘණාත්මක බවින්  ඔබේ ශක්තිය පිරිහීමට අවස්ථාව ලබා නොදෙන්න.

Source Link : Wishma Lokaya

ධනවත් වෙන්න සාර්ථක වෙන්න හොඳ පුරුදු 10 ක්

01) හොඳ පුරුදු හදා ගන්න.

අප හැමෝම ගාව හොඳ පුරුදු නරක පුරුදු යන දෙවර්ගයම තියෙනවා. යම් කෙනෙක් සාර්ථකද අසාර්ථකද යන්න තීරණය කරන ප්‍රධානතම සාධකය වන්නේ එම පුද්ගලයා තුළ ඇති දෛනික පුරුදු. සාර්ථක පුද්ගලයන් තුළ හොඳ පුරුදු ගොඩක් ඇති නමුත් නරක පුරුදු තියෙන්නේ ඉතාම ටිකයි. ඔබ තුළ ඇති නරක පුරුදු කල්පනා කර ඒවා ඔබගේ සාර්ථකත්වය වලක්වන බව ඔබට තේරුම් ගත හැකි නම් සාර්ථකත්වය කරා ගමන් කිරීමේ පළමු පියවර වන්නේද එයයි. කොළයක් අරගෙන පහත දක්වා ඇති පරිදි ඔබේ නරක පුරුදු ලියා ඒවා හොඳ පුරුදු බවට පරිවර්ථනය කර ගත හැකි ආකාරයද ලියන්න.

නරක පුරුදු

මම ගොඩක් ටීවී බලනවා
මට කාගෙවත් නම් මතක තියෙන්නෑ
දවල්ට කෑවම මම හවසට නිදාගන්නවා

හොඳ පුරුදු

මම ටීවී බලන්නේ දවසකට උපරිම වශයෙන් පැයයි.
මම වැදගත් අයගේ නම් කොළයක ලියාගෙන මතක තියාගන්නවා.
මම හවසට නිදාගන්නෙ ඉරිදා විතරමයි.

දින 30 යන තෙක් දිනපතාම ඉහත ලැයිස්තුව බලමින් එය ඔබ තුළ හොඳ පුරුදු ඇති කර ගැනීමේ මාර්ගෝපදේශකය කරගන්න. ප්‍රතිඵල ඔබව පුදුමයට පත් කරවාවි.

02) දිනපතා අරමුණු ගොඩ නගා ගන්න

සාර්ථක පුද්ගලයන් යනු අරමුණු පසුපස හඹායන පිරිසක්. ඔවුන් නිතරම විවිධ අරමුණු සහ ඉලක්ක ගොඩනගා ගන්නවා. සාර්ථක අය සෑම විටම අද දවස සැලසුම් කරන්නේ පෙරදින රාත්‍රියේ. ඔවුන් මේ සඳහා To do list කියලා වැඩ ලැයිස්තුවක් හදාගන්නවා. එම ලැයිස්තුව චූටි කඩදාසියක, ඩයරියක හෝ තමන්ගෙ ලැප්ටොප් එකේ හෝ තමන්ගෙ ෆෝන් එකේ සාදාගන්න පුළුවන්. සාර්ථකත්වය හඹායන මිනිසුන් ගොඩාක් දුර ඈත ගැන කල්පනා කරනවා. ඔවුන් තමන්ගේ අරමුණු දෛනික වශයෙන් සතිපතා, මාසිකව, වාර්ශිකව ලෙස විවිධ කාණ්ඩවලට වෙන්කර ගොඩනගා ගන්නවා. අරමුණු හදනවා විතරක් නෙමෙයි ඒ අරමුණු වලට ළඟාවෙන්න පුළුවන් සැලැස්මක්ද ඔවුන් හදා ගන්නවා

03) තමන්ගේ හැකියාවන් දිනපතා වර්ධනය කරන්න

සාර්ථක මිනිසුන් සැම විටම උත්සාහ කරන්නේ තමන්ගේ කුමන හෝ හැකියාවක් වරධනය කරගන්න. ඔවුන් තමා නිරත වී සිටින වෘත්තියට අදාළව ශිෂ්‍යයන් වගේ දිනපතාම පොත් කියවනවා. සෑම දවසකම අවසානයේදී ඔවුන් තුළ ඇති දැනුම සහ හැකියාවන් පෙර දිනයට වඩා වැඩි දියුණු කරගන්නවා. සාර්ථක මිනිසුන් කවදාවත්ම ඔවුන්ගේ අරමුණු වලට ළඟා විය නොහැකි කිසිඳු ක්‍රියාකාරකමක් වෙනුවෙන් තම කාලය වැය කරන්නේ නැහැ.

වෙනස් වන ලෝකයේ දිනපතාම දැනුම වර්ධනය කරගන්න අයට පමණයි දොරටු විවෘත වෙන්නෙ කියලා හොඳට මතක තියාගන්න.

04) දිනපතාම මුදල් ඉතිරි කරන්න.

“අතේ තියෙන සල්ලි වලට මොනව වෙනවද දන්නේ නෑ. ” ඔබත් මෙහෙම මැසිවිලි නගා තිබෙනවා නේද. මේක සත්‍යක්. සේරම වියදම් ටික කරලා සල්ලි ඉතිරි කරන්න ගියොත් කවදාවත් ඉතිරි කරන්න වෙන්නෙ නෑ. මේ හින්දා වියදම් කරන්න කලින් කීයක්හරි ඉතුරු කරන්න පුරුදු වෙන්න. සාර්ථක මිනිස්සු තමාගේ අදායමෙන් 10% ක් – 20% ක් අතර ප්‍රමාණයක් අනිවාර්යෙන් ඉතිරි කරනවා. ඉතිරි කරනවා කියලා බැංකුවෙ දාන්නම ඕනම නෑ. අවදානම් අඩු හොඳ ආයෝජන ක්‍රම වලට මුදල් යෙදවීමත් ගොඩාක් සාර්ථකයි. ඔබ හම්බකරන සල්ලි තව සල්ලි හම්බකරන්න පුළුවන් ක්‍රම වල යෙදවීමත් ගොඩාක් සාර්ථකයි.

දැන් නිකමට හිතලා බලන්න පසුගිය මාසේ ඔබේ ආදායමෙන් කීයක් ඉතුරු කරලා තියෙනවද කියලා.

05) ඔබගේ ශරීර සෞඛ්‍ය පිළිබඳව දිනපතාම අවධානය යොමු කරන්න.

දිනපතාම නිවරදි ආහාර ගැනීම සහ ව්‍යායාම කිරීමට වෙහෙසීම සාර්ථක මිනිසුන් තුළ වැදගත්ම ලක්ෂණයි. ඔබ රෝගී නොවන අයුරින් ඔබේ ශරීරය නිරෝගීව පවත්වාගෙන යාම, දිනපතාම කෙටි වේලාවක් ව්‍යායාම සඳහා වෙන් කිරීම, ඔබේ ශරීරයට ජවයක් ලබා දී වැඩි වැඩ ප්‍රමාණයක් කිරීමට ඔබට උපකාරී වෙනවා. දිනපතාම නාන එක ඔබේ පුරුද්දක් නම් දිනපතාම පොඩ්ඩක් ව්‍යායාම කිරීමත් ඒවාගේම සරල පුරුද්දක් බවට පත් කරගන්න එක අමාරු නැහැ නේද?

06) සමාජ සම්බන්ධතා නිතරම වර්ධනය කරගන්න.

යම් කිසි අයෙක් සාර්ථක මිනිසෙක්ද ඔහු නිතරම අනිත් මිනිසුන් ගැන විශාල අවධානයක් යොමු කරන මිනිසෙක්. ඔවුන් දිනපතා තම කාලයෙන් කොටසක් වැය කරනවා, දිගු කල් පවතින නව මිතුරුදම් හදාගැනීමටත්, ඇති කරගෙන ඇති සමාජ සම්බන්ධතා තව දුරටත් වැඩි කරගැනීමටත්, මෙයට ඉංග්‍රීසියෙන් කියන්නෙ Networking කියලා. දිනපතා තම මිතුරන් එක්කෙනෙකුට හෝ දෙදෙනෙකුට Call කරල ඔවුන් එක්ක විනාඩියක් පමණ කතා කරන්න වෙන්කර ගන්න. ඔබට කල හැකි මොනවහරි උදව්වක් ඔවුන්ට අවශ්‍ය නම් කිසිඳු ප්‍රතිලාභයක් ගැන හිතන්නෙ නැතුව තමාට හැකි උපරිමෙන් ඒ උදව්ව කරන්න‍. ඔබට උදව්වක් ඕන වෙලාවට ඒ මිනිස්සු ඒ මිනිස්සු උදව් කරන්නෙ අන්න එතකොට.

මේ ලෝකෙ ලස්සනම වචනය මොකද්ද ඒ ඔබේ නම නේද. අපි කවුරුත් අහන්න කැමති ලස්සනම වචනය තමයි නම. කාටහරි ඔබේ නම මතක තියේනම් ඔබට එය කෙතරම් සතුටක් ඇති කරනවාද? මේ නිසා අද ඉඳලවත් ඔබ ආශ්‍රය කරන අයගේ නම් මතක තියාගෙන ඔවුන්ට ඔවුන්ගේ නමින්ම ආමන්ත්‍රණය කරන්න උත්සහ කරන්න.

07) නිතරම මධ්‍යම ප්‍රතිපදාව අනුගමනය කරන්න.

ජීවිතය සමබර කරගන්න පුළුවන් හොඳම විධිය තමයි සෑම ක්‍රියාකාරකමක්ම අඩුත් නැති වැඩිත් නැති ක්‍රියාකාරකමක් ලෙස කිරීමයි. ආහාර ගැනීම, කාර්යාලයේ වැඩ කිරීම, ටීවී බැලීම, අන්තර්ජාලය භාවිතා කිරීම, නිදා ගැනීම වැනි පුරුදු සෑම දෙයක්ම ඔබ කරන්නේ අඩුත් නැති වැඩිත් නැති ඔබගේ තත්වයට ගැලපෙන ලෙස බවට වග බලාගන්න. ඒ වගේ මිනිස්සු සාර්ථක වෙනවා. ඒ වගේ මිනිස්සු අවට ගැවසෙන්න අනිත් අයත් කැමතියි.

08) අද වැඩ අදම ඉවර කරලා දාන්න.

අද ඔබට ඉවර කරන්න පුළුවන් වැඩ කවදාවත් හෙටට කල්දාන්න එපා හුඟක් අය වැඩ කල්දාන්නෙ තමා තුළ ඒ පිළිබඳ ඇති බිය නිසා. එවැනි බිය හැමෝටම තියෙනවා. නමුත් සාර්ථකත්වය කියන්නේ ඒ බය පරාජය කිරීමයි. සාර්ථක මිනිසුන් මොන ප්‍රශ්න තිබුණත් කරන්න ඕන වැඩේ ඉවර කරලම තමයි ආයෙත් පස්ස බලන්නෙ.

“අදම කරන්න” “අදම කරන්න” වැනි වදන් දවසට 100 සැරයක් හරි කමක්නෑ තම මනසින් මුමුණමින් සිටීම අපිට වැඩ කරන්න දෛර්ය ලබා දෙන බවයි මනෝ විද්‍යාඥයින් පවසන්නේ.

09) නිරතුරුවම සුබවාදී දැක්මකින් සිටින්න.

මුලින්ම ඔබ හොඳින් හඳුනන වඩාත් සාර්ථක කෙනෙක් ගැන හිතල බලන්න. ඔහු සුබවාදීද? අසුබවාදීද? මේ ලෝකයේ ඉන්න හැම සාර්ථක පුද්ගලයෙක් වගේම ඔහු ඉතාම සුබවාදී ජීවිතය උපරිමෙන් විඳින, මනා ජවයෙන් පිරුණු, ඉතා සතුටින් සිටින අයෙකු විය යුතුයි. සෑම සාර්ථක මිනිසෙක්ම අපට මේ ආකාරයෙන් පෙනෙන්නේ සාර්ථක මිනිස්සු දන්නවා තමා තුලත් අන් අය කෙරෙහිත් සුබවාදී දේ පමණක් දැකීමට හුරු වීම කෙතරම් වැදගත්ද යන බව. මෙවැනි පුද්ගලයන්ට ඔවුන්ට තිබෙන ගැටළු, ජය ගැනීමට තිබෙන තවත් එක අභියෝගයක් ලබා දෙන අවස්ථාවක් පමණයි. මේ නිසා ඔවුන් ගැටළු දෙස බලන්නේද සුබවාදීව හා සතුටින්

ඔබට සුබවාදීව  ඉන්න අවශ්‍ය නම් මුලින්ම නරක ප්‍රවෘත්ති, විනාශකාරී රූපවාහිනී වැඩසටහන් බලන එක නතරකරලා දාන්න. අද රූපවාහිනිය දැම්මොත් පෙන්නන්නෙ විනාශකාරී අපරාධ ගැන පුවත් එහෙම නැත්නම් පවුල් ප්‍රශ්න තියෙන ටෙලිනාට්‍ය. රූපවාහිනී නැරඹීමට ඔබ නාස්ති කරන කාලය අඩුම තරමෙ සුබවාදී සතුටු දෙයක් වෙනුවෙන් වෙන් කරගන්න.

තමා වටා ඉන්න පසුගාමී මිනිසුන් ඕපාදූප කාරයන්ගෙන් හැකිතාක් ඈත් වන්න.

10) ස්වයංවාරණ ඇති කරන සිතුවිලි ප්‍රතික්ෂේප කිරීම

සාර්ථක මිනිසුන්ගෙ තියෙන අපූරු දෙයක් තමයි ඔවුන් තමාගේම සිතුවිලි හා හැඟීම් වලට එරෙහිව තමාම විධාන ලබාදීම. හිතට නරක සිතුවිල්ලක් ආව ගමන් එහෙම නැත්නම් තමාගේ සාර්ථකත්වයට බාධා කරන හැඟීමක් ආව ගමන් ඔවුන් වහාම තමාටම විධාන කරනවා ඒ සිතුවිල්ල අයින් කරන්න කියලා. මේ විධියට තමා තමා සමඟම කතා කරමින් තම දියුණුවට උත්සාහ කිරීම තුළ පුදුමාකාර බලයක් සැඟවී ඇති බව මනෝ විද්‍යාඥයින් පවසනවා.

දිනකට එක වරක් හෝ මේ අකාරයෙන් තමා තමාටම විධාන ලබාදෙමින් නරක සිතුවිලි බැහැර කරන පුද්ගලයන්ගෙන් වැරදි සිද්ධ වෙනවා අඩුයි.

ලිපි මුලාශ්‍රය – සිංහල පිඩියා

Source Link : Wishma Lokaya